TikTok، Instagram Reels، YouTube Shorts سياقتى پلاتفورمالار ءبىزدىڭ كونتەنت تۇتىنۋ داعدىمىزدى تۇبەگەيلى وزگەرتىپ ۇلگەردى. ولار كوڭىل كوتەرەدى، اقپارات بەرەدى، جارناما مەن ساياساتقا دا ىقپال ەتەدى. الايدا جاڭا زەرتتەۋلەر شەكسىز سكروللينگتىڭ ميعا ەلەۋلى اسەر ەتەتىنىن كورسەتىپ وتىر، دەپ حابارلايدى Aqshamnews ءتىلشىسى.
زەرتتەۋ نە كورسەتتى؟
اۆسترالياداعى گريففيت ۋنيۆەرسيتەتىنىڭ عالىمدارى 71 عىلىمي ماقالانىڭ نەگىزىندە 100 مىڭعا جۋىق ادامنىڭ دەرەكتەرىن تالداپ، قىسقا ۆيدەولاردىڭ كوگنيتيۆتى فۋنكسيالار مەن پسيحيكالىق دەنساۋلىققا اسەرىن زەرتتەگەن.
عالىمداردىڭ ايتۋىنشا، قىسقا روليكتەردى ءجيى قاراۋ مي قىزمەتىنىڭ تومەندەۋىنە، زەيىننىڭ ناشارلاۋىنا جانە رەاكسيانى باقىلاۋ قابىلەتىنىڭ السىرەۋىنە اكەلۋى مۇمكىن. بۇل جاسوسپىرىمدەرگە دە، ەرەسەكتەرگە دە قاتىستى.
زەرتتەۋ گروۋۆس پەن تومپسوننىڭ «ۇيرەنۋ جانە سەزىمتالدىقتىڭ قوس تەورياسىنا» نەگىزدەلگەن.
عالىمدار مىناداي قورىتىندى جاساعان:
- جىلدام، قىسقا روليكتەر تاۋەلدىلىك تۋدىرۋى مۇمكىن، سونىڭ سالدارىنان مي تىنىش، ۇزاق ۋاقىت تالاپ ەتەتىن ارەكەتتەرگە — كىتاپ وقۋ، تاپسىرما ورىنداۋ سياقتى — اۋىسۋدى قيىن قابىلدايدى؛
- كونتەنتتى ىرىكتەيتىن الگوريتمدەر يمپۋلسيۆتىلىكتى ارتتىرىپ، لەزدە ءلاززات الۋعا ۇمتىلىستى كۇشەيتەدى؛
- قىسقا ۆيدەولاردى شامادان تىس قاراۋ الەۋمەتتىك وقشاۋلانۋعا، ومىرگە قاناعاتتانۋدىڭ تومەندەۋىنە، ۇيقىنىڭ بۇزىلۋىنا جانە مازاسىزدىقتىڭ كۇشەيۋىنە اكەلۋى مۇمكىن.
زەرتتەۋشىلەردىڭ ايتۋىنشا، مۇنداي اسەر بارلىق جاس توپتارىندا بايقالادى، ياعني قىسقا ۆيدەولاردى كوپ كورەتىن ادامداردىڭ نازارىن شوعىرلاندىرۋى ايتارلىقتاي ناشارلايدى.
الداعى جوسپار
عالىمدار قىسقا ۆيدەولارعا تاۋەلدىلىكتى باعالايتىن ارنايى شكالا جاساعان. بۇل بولاشاق زەرتتەۋلەر ءۇشىن پايدالى قۇرال بولماق.
اۆتورلاردىڭ ايتۋىنشا، قىسقا ۆيدەولاردىڭ تانىمالدىعى ارتىپ كەلە جاتقاندىقتان، ولاردىڭ كوگنيتيۆتى فۋنكسيالار مەن مىنەز-قۇلىققا اسەرىن تەرەڭىرەك زەرتتەۋ قاجەت.