قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەربايەۆ كاۆكاز مۇسىلماندارى باسقارماسىنىڭ ءتوراعاسى شەيح-ۋل-يسلام اللاحشۇكىر پاشا-زادەمەن كەزدەستى، دەپ حابارلايدى almaty-akshamy.kz اقورداعا سىلتەمە جاساپ.
تاراپتار كەزدەسۋ بارىسىندا ءححى عاسىردا الەمدىك قاۋىمداستىق كوپتەگەن سىن-قاتەرلەرمەن بەتپە-بەت كەلگەنىن، ونىڭ ىشىندە الەۋمەتتىك جانە ءدىنارالىق قاقتىعىستارعا سەبەپ بولاتىن ءدىني ەكسترەميزمنىڭ بەلەڭ العانىن اتاپ ءوتتى. بۇل رەتتە قوردالانعان ماسەلەلەردى شەشۋدىڭ ءتيىمدى ستراتەگياسىن ازىرلەۋ، سونداي-اق، دىندەر مەن كونفەسسيالاردىڭ، ۇلتتار مەن ۇلىستاردىڭ ۇندەستىكتە ءومىر ءسۇرۋىن قامتاماسىز ەتۋ - ماڭىزدى جۇمىستاردىڭ ءبىرى.
قىرىمبەك كوشەربايەۆ ايماقتىق جانە جاھاندىق دەڭگەيدەگى كونفەسسياارالىق ديالوگتى نىعايتۋ ءبىزدىڭ ەل ۇستانعان ساياساتتىڭ باسىم باعىتتارىنىڭ ءبىرى ەكەنىن ايتتى. قازاقستان وسىدان 20 جىلعا جۋىق ۋاقىت بۇرىن الەمدىك جانە ءداستۇرلى دىندەر كوشباسشىلارىنىڭ سەزىن وتكىزۋ تۋرالى ستراتەگيالىق ۇسىنىسىن جاريالاعان بولاتىن. بۇل ءبىزدىڭ ەلىمىزدىڭ رۋحاني كوشباسشىلارمەن سىندارلى ديالوگ ورناتۋعا، زاماناۋي سىن-قاتەرلەرگە قارسى بىرلەسكەن ءتيىمدى جاۋاپ تابۋعا ۇمتىلىسىن دالەلدەيدى.
قىرىمبەك كوشەربايەۆ شەيح-ۋل-يسلام اللاحشۇكىر پاشا-زادەگە الەمدىك جانە ءداستۇرلى دىندەر كوشباسشىلارى سەزىنىڭ جۇمىسىنا ۇنەمى ءارى بەلسەندى قاتىسىپ كەلە جاتقانىنا، كاۆكاز مۇسىلماندارى باسقارماسىنىڭ كونفەسسياارالىق جانە ءدىنارالىق ديالوگتى ىلگەرىلەتۋگە قاتىستى قازاقستاننىڭ ۇسىنىستارىن قولداپ وتىراتىنىنا ريزاشىلىعىن ءبىلدىردى.