الماتى اكىمى دارحان ساتىبالدى جاڭا وقۋ جىلىنىڭ قارساڭىندا ءبىلىم بەرۋ مەكەمەلەرىنىڭ دايىندىعىنا ارنالعان جۇمىس كەڭەسىن وتكىزدى.
كەڭەس بارىسىندا قالالىق ءبىلىم باسقارماسىنىڭ باسشىسى سايران سايفەدەنوۆ 2025–2026 وقۋ جىلىندا الماتىدا 353 جالپى ءبىلىم بەرەتىن ۇيىم جۇمىس ىستەيتىنىن حابارلادى.
كونستيتۋسيا كۇنى مەن ءبىلىم كۇنىنە وراي قالادا جاڭا مەكتەپتەر اشىلادى. «كەلەشەك مەكتەپتەرى» جوباسى اياسىندا 7 جاڭا مەكتەپ پايدالانۋعا بەرىلەدى. جالپى سىيىمدىلىعى – 12 مىڭ ورىن. ولار تەرەكتى، سامعاۋ، قاراسۋ، اقبۇلاق، نۇرلى دالا شاعىناۋداندارىندا، سونداي-اق ليەۆيتان كوشەسى مەن رايىمبەك داڭعىلى، 210 مەكەنجايىندا ورنالاسقان. بۇدان بولەك، قىركۇيەك ايىنىڭ سوڭىنا دەيىن تاعى 5 مەكتەپ پايدالانۋعا بەرىلەدى. ولاردىڭ سىيىمدىلىعى – 10،5 مىڭ ورىن.
جاڭا ءبىلىم وشاقتارىنا 10 889 وقۋشى قابىلداندى. وقىتۋ ۇدەرىسىن قامتاماسىز ەتۋ ءۇشىن 693 پەداگوگ جۇمىسقا الىندى. ونىڭ ىشىندە 350ء-ى enbek.kz پورتالى ارقىلى كونكۋرس نەگىزىندە ىرىكتەلگەن، 343ء-ى باسقا ءبىلىم بەرۋ ۇيىمدارىنان اۋىستىرىلعان.
قالانىڭ وقۋشىلارىن قامتيتىن «مەكتەپ اۆتوبۋسى» جوباسى جالعاسۋدا. بۇگىندە ول 44 مەملەكەتتىك مەكتەپتىڭ 7 532 وقۋشىسىن تاسىمالدايدى. جاڭا مەكتەپتەردىڭ اشىلۋىنا بايلانىستى جوباعا دەگەن سۇرانىس ارتىپ وتىر.
بيىلعى ءبىلىم كۇنىنە ارنالعان سالتاناتتى جيىندار 1 قىركۇيەكتە تەك 1-سىنىپ جانە ءبىتىرۋشى 11-سىنىپ وقۋشىلارى ءۇشىن وتەدى. ال ءبىرىنشى سىنىپقا 29 240 بالا، 11-سىنىپقا 19 765 وقۋشى بارادى. قالعان سىنىپتار ءۇشىن 2 قىركۇيەكتە ءبىلىم كۇنىنە ارنالعان «سىنىپ ساعاتى» ۇيىمداستىرىلادى.
تەحنيكالىق جانە كاسىپتىك ءبىلىم بەرۋ جۇيەسىندە قالادا 88 كوللەدج جۇمىس ىستەيدى. وندا 85 544 ستۋدەنت وقيدى. ولارعا ارنالعان 46 جاتاقحانادا 6 100-دەن استام ورىن قاراستىرىلعان. سونىڭ ىشىندە 10 مەملەكەتتىك كوللەدجدىڭ جانىنداعى 11 جاتاقحانا 2 200-دەن استام ورىن ۇسىنادى.
جوعارى ءبىلىم بەرۋ سالاسىندا الماتىدا 35 ۋنيۆەرسيتەت بار. مۇندا 202 مىڭ ستۋدەنت ءبىلىم الۋدا. ولار ءۇشىن قالانىڭ ستۋدەنتتىك جاتاقحانالارىندا 128 مىڭنان استام ورىن بولىنگەن.