قازاقستان مەن رەسەي تەڭتوراعا بولادى.
قىرعىز تارابىنىڭ ۇسىنىسىمەن تمد مەملەكەتتەرى باسشىلارىنىڭ كەلەسى كەڭەسى 2023 جىلى 13ء-شى قازانىندا بىشكەكتە وتەدى، دەپ حابارلايدى Almaty-akshamy.kz
ب ا ق وكىلدەرىمەن كەزدەسۋدە اتقارۋشى كوميتەتتىڭ ءتوراعاسى سەرگەي لەبەديەۆ، تمد مەملەكەت باسشىلارىنىڭ كەڭەسىندە قابىلدانعان ورتاق شەشىمدەر تىعىز قارىم-قاتىناس پەن جۇيەلى جۇمىستاردىڭ جەمىسى ەكەندىگىن ايتتى. كۇرمەۋى شەشىلمەگەن ماسەلەلەر ءالى دە بار. سوندىقتان كوپجاقتى كەلىسسوزدەردى شيراتۋىمىز قاجەت، دەدى ءتوراعا.
«اتقارۋشى كوميتەتتىڭ باسشىسى رەتىندە قازاقستان ءتوراعالىق ەتكەن كەزەڭدەردەگى جۇزەگە اسقان شارالارعا وڭ باعا بەرگىم كەلەدى. ءبىز يىق تىرەسە جۇمىس ىستەدىك. مۇشە مەملەكەتتەر اراسىنداعى ىنتىماقتى ساقتاۋ مەن نىعايتۋ بويىنشا كوپ جۇمىس اتقارىلدى. الدا تمد ەكونوميكالىق كەڭەسىنىڭ وتىرىسى بار. ول 9 جەلتوقساندا ماسكەۋدە وتەدى. قازاقستان ءتوراعالىق ەتەتىن باسقوسۋ دا جەمىستى بولادى دەپ ۇمىتتەنەمىز»، - دەيدى تمد اتقارۋشى كوميتەتىنىڭ ءتوراعاسى سەرگەي لەبەديەۆ.