ۆەدومستۆو الماتى حالىقارالىق اۋەجايىنىڭ جولاۋشىلار تەرمينالىندا كەدەندىك باقىلاۋدىڭ كۇشەيتىلگەنىن حابارلادى
الماتى اۋەجايىندا iPhone 14 جانە iPhone 13 ماركالى دەكلاراسيالانباعان ۇيالى تەلەفونداردى، سونداي-اق Macbook جانە AirPods سىندى جالپى سانى 70 دانا تاۋاردى دۋباي – الماتى باعىتى بويىنشا زاڭسىز اكەلۋ ارەكەتىنىڭ جولى كەسىلدى، دەپ حابارلايدى Almaty-akshamy.kz.
الماتى قالاسى بويىنشا مەملەكەتتىك كىرىستەر دەپارتامەنتىنىڭ مالىمەتىنشە، كونتروباندالىق ارەكەتتى 2022 جىلعى 12 قازاندا الماتى قالاسى بويىنشا مكد "جەتىسۋ" كەدەن بەكەتىنىڭ لاۋازىمدى تۇلعالارى الماتى قالاسىنىڭ اۆياسيالىق كولىك پروكۋراتۋراسىمەن جانە الماتى شەكارا قىزمەتىمەن بىرلەسىپ انىقتاعان.
«ۇستالعان 70 دانا تاۋار ۋاقىتشا ساقتاۋ قويماسىنا اۋىستىرىلدى جانە ماتەريالدار ق ر قىلمىستىق كودەكسىنىڭ 234-بابىنا سايكەس ءىس جۇرگىزۋ شەشىمىن قابىلداۋ ءۇشىن الماتى قالاسى بويىنشا ەكونوميكالىق تەرگەۋ دەپارتامەنتىنە جىبەرىلدى»، — دەلىنگەن حابارلامادا.
ۆەدومستۆو الماتى حالىقارالىق اۋەجايىنىڭ جولاۋشىلار تەرمينالىندا كەدەندىك باقىلاۋدىڭ كۇشەيتىلگەنىن حابارلادى.
«ەۋرازيالىق ەكونوميكالىق كوميسسيا كەڭەسىنىڭ 2017 جىلعى 20 جەلتوقسانداعى №107 "جەكە پايدالانۋعا ارنالعان تاۋارلارمەن بايلانىستى جەكەلەگەن ماسەلەلەر تۋرالى" شەشىمىنە سايكەس، جەكە تۇلعالار جەكە پايدالانۋعا ارنالعان كەدەن وداعىنىڭ كەدەندىك شەكاراسى ارقىلى وتكىزەتىن تاۋارلاردى جاتقىزۋ كريتەرييلەرى بويىنشا، ءبىر تۇلعاعا ەكى تالدان اسپايتىن ۇيالى تەلەفونداردى اكەلۋ رۇقسات ەتىلەدى»، — دەلىنگەن حابارلامادا.