قىرعىز ەلىندە قازاقستاننىڭ مادەنيەت كۇندەرى وتۋدە

مادەنيەتتىڭ شەكاراسى كەڭ

قىرعىزستاندا قازاقستاننىڭ مادەنيەت كۇندەرى ءوتىپ جاتىر، دەپ حابارلايدى Almaty-akshamy.kz. Qazaqtv.com سايتىنا سىلتەمە جاساپ.

وپەرا اريالارى، اۋەزدى دە اۋەندى اندەر، اۆتورلىق كينو جانە مۇراجاي كورمەلەرى. قىرعىزستاندا قازاقستاننىڭ مادەنيەت كۇندەرى وتۋدە.

ەل تاۋەلسىزدىگىنىڭ 30 جىلدىعىنا ورايلاستىرىلعان باعدارلاما شىمىلدىعى وتاندىق كينووندىرىستىڭ تىڭ تۋىندىلارىمەن ءتۇرىلدى.

تاريحي مۇرا، ۇلتتىق بولمىس پەن قۇندىلىقتارىمىزدان سىر شەرتەتىن تانىمدىق فيلمدەر كورسەتىلىمى بىشكەكتەگى «ماناس» كينوتەاترىندا ءوتتى.

«ءبىز باۋىرلاس ەلمىز. بىر-بىرىنە قازاق پەن قىرعىزدان جاقىن حالىق جوق دەپ ايتۋعا بولادى. بىزگە ءبىر-بىرىمىزدى ءتۇسىنۋ ءۇشىن اۋدارماشى قاجەت ەمەس. سەبەبى ءتىلىمىز ۇقساس، تاريحىمىز، ءدىنىمىز، داستۇرلەرىمىز دە ورتاق. ەلىمىزدىڭ تاۋەلسىزدىگىنىڭ 30 جىلدىعى اياسىندا حالقىمىزدىڭ بىرلىگىن نىعايتاتىن، دوستىققا ۇندەيتىن وسى تەكتەس شارالار كوبىرەك بولسىن دەپ تىلەيمىن»، - دەدى قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا.

قىرعىزستانداعى قازاقستان مادەنيەتى كۇندەرىنىڭ رەسمي اشىلۋ سالتاناتىنا وراي ۇلتتىق فيلارمونيادا گالا-كونسەرت ۇيىمداستىرىلدى.

قىرعىز جۇرتى قازاقستاندىق ساحنا ساڭلاقتارىنىڭ شىعارماشىلىعىمەن جاقىن تانىس. سوندىقتان سۇيىكتى اندەرىن قوسىلا شىرقاپ، جىلى لەبىزدەرىن ءبىلدىردى. قىرعىزستان پرەزيدەنتى سادىر جاپاروۆ مادەني كەشتىڭ قۇرمەتتى قوناعى بولدى.