بالەت: جەرلەسىمىز الەم ساحناسىن باعىندىردى

باحتيار جارادى

باحتيار ادامجان الەم ساحناسىن باعىندىردى، دەپ حابارلايدى Almaty-akshamy.kz.

قازاقستاندىق بالەت ءارتيسى باحتيار ادامجان ريم وپەراسى مەن ارەنا دي ۆەرونا ساحناسىندا ونەر كورسەتىپ، يتاليانىڭ تالعامپاز كورەرمەنىنىڭ جۇرەگىن جاۋلادى.

«استانا وپەرا» تەاترىنىڭ جەتەكشى ءسوليسى، قازاقستاننىڭ ەڭبەك سىڭىرگەن قايراتكەرى بۇگىندە شەتەلدە جاقسى تانىمال.

بالەت ونەرىن كاسىپ ەتكەن قازاق بالاسى جايلى شەتەلدىك باسىلىمدار جارىسا جازىپ، ونىڭ ونەرىن جوعارى باعالادى. «15 مىڭ كورەرمەن سىياتىن ارەنا دي ۆەرونا انتيكالىق امفيتەاترىنىڭ اتموسفەراسى ەرەكشە»، – دەيدى جەرلەسىمىز.

«كوپتەگەن شاقىرتۋ ءتۇسىپ جاتتى، ءبىراق ونىڭ بارلىعى ىسىرىلىپ، ۋاقىتىن اۋىستىرا بەردى. دەسە دە، ساپارىمىزدى مامىر ايىنان باستاپ كەتتىك. ءبىرىنشى كورشى رەسەي مەملەكەتىنە بارىپ كەلدىم، سودان كەيىن، مىنە، كوپتەن كۇتكەن يتالياعا دا جەتتىم. ريم قالاسىنا باردىم. ءبىزدىڭ يتالياعا گاسترولدىك ساپارىمىز ۆەرونا ارەناسىنان باستالدى. بۇل ايگىلى «لاسكالانىڭ ەتۋالى»، «روبەرتو بوللە جانە ونىڭ دوستارىنىڭ» گالا-كونسەرتى بولدى. ۇلكەن فەستيۆال وسى بالەتپەن اياقتالدى»، - دەدى «استانا وپەرا» تەاترىنىڭ جەتەكشى ءسوليسى باحتيار ادامجان.

ۆەروناداعى فەستيۆالدەن كەيىن وتاندىق بالەت ءارتيسى يتاليا كورەرمەنىمەن 14، 15، 16 قىركۇيەك كۇندەرى قايتا قاۋىشقان. وندا ول كورنەكتى حورەوگراف رولان پەتيدىڭ «قۇداي انا سوبورى» قويىلىمىنىڭ ريم وپەراسىنداعى تۇساۋكەسەرىندە كۆازيمودو پارتياسىن تانىستىرعان. ەۋروپادا قازاق بالەتىنىڭ دەڭگەيىن كورسەتىپ قايتقان باحتيار ادامجان وتاندىق كورەرمەندەرمەن ساعىنىسىپ كورىستى.