مەملەكەت باسشىسى ەربولات دوسايەۆتى قابىلدادى
مەملەكەت باسشىسى ۇلتتىق بانك ءتوراعاسىنىڭ بيىلعى 9 اي ىشىندەگى اقشا-نەسيە ساياساتىن جۇزەگە اسىرۋدىڭ الدىن الا قورىتىندىلارى تۋرالى، الەمدىك ەكونوميكانى قايتا قالپىنا كەلتىرۋدىڭ قارقىنى جانە ونى پاندەمياعا دەيىنگى دەڭگەيگە جەتكىزۋ، سونداي-اق دامىعان ەلدەردەگى ورتالىق بانكتەردىڭ اقشا-نەسيە ساياساتىن كۇشەيتۋگە كوشە باستاعانى جونىندە ەسەپ بەردى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
ەربولات دوسايەۆ پرەزيدەنتكە قىركۇيەك ايىندا جىلدىق ينفلياسيانىڭ 8،9 پايىزعا دەيىن قارقىن العانى جايىندا باياندادى. ايلىق ينفلياسيانىڭ ارتۋىنا اقىلى قىزمەتتەر، سونىڭ ىشىندە، ەڭ الدىمەن ءبىلىم بەرۋ جانە تۇرعىن ۇيلەردى جالعا الۋ سالالارى ۇلكەن ۇلەس قوستى.
قاسىم-جومارت توقايەۆقا ۇلتتىق بانكتىڭ ۇكىمەتپەن بىرلەسىپ جۇزەگە اسىرىپ جاتقان ينفلياسياعا قارسى كەشەندى شارالارى جانە ينفلياسيانى بولدىرماۋ جونىندەگى مونەتارلىق ساياساتتىڭ نەگىزگى باعىتتارى تۋرالى مالىمەت بەرىلدى. الەۋمەتتىك ماڭىزى بار ازىق-تۇلىك تاۋارلارىنا قاتىستى باعا بيىلعى تامىز ايىنداعى 10،4 پايىزدان قىركۇيەكتە 9،6 پايىزعا دەيىن تومەندەگەنى اتاپ ءوتىلدى.
ۇلتتىق بانك ءتوراعاسىنىڭ مالىمەتى بويىنشا، شيكىزات تاۋارلارى باعاسىنىڭ قىمباتتاۋىنا، تۇتىنۋشىلار تاراپىنان تۋىنداعان شەكتەۋلەرگە بايلانىستى الەمدەگى تۇتىنۋ باعالارى ەڭ جوعارى دەڭگەيدە ساقتالىپ وتىر. كەزدەسۋ بارىسىندا جىل سوڭىنا دەيىن جانە 2022 جىلعا ارنالعان ەنەرگيا تاسىمالداۋشىلار باعاسىنا قاتىستى بولجامدار ۇسىنىلدى.
پرەزيدەنتكە ۇلتتىق بانكتىڭ التىن-ۆاليۋتا رەزەرۆتەرى مەن ۇلتتىق قور اكتيۆتەرىنىڭ جاي-كۇيى، سونداي-اق ۆاليۋتا نارىعىنداعى احۋال جونىندە باياندالدى.
سونىمەن قاتار مەملەكەت باسشىسىنىڭ تاپسىرمالارىن ورىنداۋ اياسىندا ۇلتتىق تولەم جۇيەسىن دامىتۋدىڭ جانە سيفرلىق بيومەتريالىق سايكەستەندىرۋدىڭ ۇلتتىق پلاتفورماسىن قۇرۋدىڭ الدىن الا ناتيجەلەرى تۋرالى مالىمەت بەرىلدى.