ۇيىمداسقان قىلمىستىق توپ 11 قاتىسۋشىدان قۇرىلعان.
قارجىلىق مونيتورينگ اگەنتتىگى رەيدەرلىك جاسادى دەپ ايىپتالعان كۇدىكتى ە.قوسپايەۆ پەن ونىڭ سەنىمدى تۇلعالارىنا قاتىستى تەرگەۋ باستادى. ولار ۇيىمداسقان قىلمىستىق توپ قۇردى جانە وعان قاتىستى دەگەن كۇدىككە ءىلىنىپ وتىر، دەپ حابارلايدى Almaty-akshamy.kz
ۇيىمداسقان قىلمىستىق توپ 11 قاتىسۋشىدان قۇرىلعان، ونىڭ 5-ەۋى قاماۋعا الىندى، ال ۇيىمداستىرۋشى ەلدوس قوسپايەۆپەن بىرگە 6 ادامعا ىزدەۋ جاريالاندى.
ەستەرىڭىزگە سالا كەتەيىك، قىلمىستىق توپ الماتى قالاسىنىڭ كاسىپكەرلەرىن قورقىتۋ ارقىلى رەيدەرلىك ارەكەتتەرىن جۇزەگە اسىرىپ وتىرعان.
ۇقت زورلىق-زومبىلىق پەن قورقىتۋ ارقىلى كاسىپكەرلەردىڭ مۇلكىن تارتىپ الۋمەن، كومپانيالارداعى ۇلەسىن ءوز اتىنا اۋدارۋمەن جانە كولەڭكەلى بيزنەسپەن اينالىستى.
ماسەلەن، 2019 جىلعى 4 ناۋرىزدا الماتى قالاسىندا قوسپايەۆ ءوزىنىڭ سىبايلاستارىمەن بىرگە بيزنەستى دامىتۋعا 160 ملن تەڭگە سالعان «Profit Trade Ltd» ج ش س يەلەرىن ءوز ۇلەسىنىڭ 40%-ىن ۇقت-نىڭ بەلسەندى مۇشەسى يماشيەۆقا جازىپ بەرۋگە ءماجبۇر ەتتى.
بۇرىنعى باسشىلاردى باسقارمادان شەتتەتە وتىرىپ، ۇقت مۇشەلەرى قۇجاتتاردى قولدان جاساۋ ارقىلى قالعان 35% ۇلەستى يەلەندى.
كومپانيا الكوگول ونىمدەرىن كوتەرمە ساتۋمەن اينالىسىپ، تۇراقتى تابىس اكەلگەن.
ال، 2020 جىلعى 30 شىلدەدە قوسپايەۆتىڭ قىلمىستىق توبى ءوز بيزنەسىنە 400 ملن. تەڭگەدەن استام ينۆەستيسيا سالعان «Azovita Aktay» ج ش س مەن «Azovita Atyray» ج ش س مەنشىك يەسىنىڭ ومىرىنە ءقاۋىپ ءتوندىرۋ ارقىلى ۇقت مۇشەلەرىنە كاسىپورىنداردىڭ جارعىلىق كاپيتالىنىڭ 100% ۇلەسىن وتەۋسىز بەرۋگە ءماجبۇر ەتتى.
قوسپايەۆ باستاعان جوعارىدا اتالعان ۇقت مۇشەلەرى كومپانيالاردى ءوز باقىلاۋىنا الىپ، ولاردى الماتى، اتىراۋ، قوستاناي، ماڭعىستاۋ وبلىستارىندا، سونداي-اق الماتى قالاسىندا الكوگول ونىمدەرىن زاڭسىز ساتۋعا پايدالانا باستادى.
ءوزىنىڭ جازاسىزدىعىن سەزىنگەن قوسپايەۆ پەن ونىڭ ۇقت مۇشەلەرى تابىستى كاسىپورىنداردى تارتىپ الۋدى ودان ءارى جالعاستىردى.
2021 جىلدىڭ شىلدەسىندە قاپشاعاي سۋ قويماسىندا «Kapchagai Marina سlub» جشس-نە تيەسىلى قۇنى 2 ملن. اقش دوللارىن قۇرايتىن دەمالىس ايماعىن كۇشپەن يەمدەندى.
سونىمەن قاتار، قوسپايەۆ ءوزىنىڭ سەنىمدى تۇلعالارى ارقىلى الماتى قالاسىنىڭ ەڭ بەدەلدى اۋداندارىنىڭ بىرىندە «ەسەنتاي سيتي» تۇرعىن ءۇي كەشەنىنىڭ قۇرىلىسىن جۇزەگە اسىراتىن «AV-Construction» جشس-دەگى ۇلەسىنىڭ 75% يەلەندى.
قالعان 25%-ى بەلگىلى كاسىپكەر ءابدىعاپپاروۆقا تيەسىلى بولدى، ول 2016 جىلى ج ش س اتىنان تۇرعىن ءۇي قۇرىلىسىنا 31 گا اۋماقتى ساتىپ الدى.
كوسپايەۆ پەن ونىڭ سەرىكتەستەرى جەكە باسىن بايىتۋ ماقساتىندا تۋىستارىنا پاتەرلەر مەن كوممەرسيالىق ءۇي-جايلاردى راسىمدەۋ ارقىلى ج ش س مۇلكىن ۇرلادى.
2018 جىلدىڭ قازان ايىنان باستاپ قوسپايەۆ پەن ۇقت مۇشەلەرى بابايەۆ، ءابىجانوۆ، تاناشيەۆ، كۋدرياشوۆا جانە باسقا دا تۇلعالار 3 جەر ۋچاسكەسىن، 20 كەڭسە ءۇي-جايىن جانە 113 پاتەردى يەمدەندى. ءسويتىپ، 4،6 ملرد تەڭگە سوماسىنا زالال كەلتىردى.
قوسپايەۆ بىرلەسكەن مەنشىك يەسى ءابدىعاپپاروۆتىڭ كومپانيانىڭ مۇلكىن ۇرلاۋمەن بايلانىستى شاعىمدارىن بولدىرماۋ ءۇشىن ونىڭ اناسى س. جۇنىسبەكوۆاعا رەسىمدەلگەن 25% ۇلەسىن الىپ قويۋ جونىندە شەشىم قابىلدادى.
ءابدىعاپپاروۆتى ۇستاۋ جانە كەيىننەن تۇتقىنداۋ ۇقت مۇشەلەرى ءۇشىن ونىڭ قارت اناسى س.جۇنىسبەكوۆاعا قىسىم جاساۋ قۇرالى بولدى، «AV-Construction» جشس-دەگى ۇلەسىن ۇلىنا تۇرمەدەن شىعۋعا كومەككە ايىرباستاۋعا ۋادە بەردى.
ۇقت مۇشەلەرىنىڭ شابۋىلىنا توتەپ بەرە الماعان جۇنىسبەكوۆا ۇلى ءۇشىن قورقىپ، كومپانياداعى ءوز ۇلەسىن وتەۋسىز ۇقت مۇشەلەرىنىڭ اتىنا اۋدارىپ بەردى.
تەرگەۋ اياسىندا ۇقت قىلمىستىق جولمەن الىنعان مۇلكىنە تىيىم سالىندى - بۇل 133 جىلجىمايتىن مۇلىك، 11 جەر، 35 پرەميۋم كولىك جانە 9 ميلليون دوللار قولما-قول اقشا.
سونىمەن قاتار، قوسپايەۆ ەشقانداي قۇجاتسىز الماتى وبلىسىندا قالا سىرتىنداعى باسسەينى، ترەناجەر زالى بار ءساندى ءۇي سالدى. وندا ول اسىل تۇقىمدى جىلقىلاردى ءوسىردى، ارىستان، ايۋ، تاعى باسقا جابايى جانۋارلارى بار حايۋاناتتار باعىن ۇستادى.
«قوسىمشا ىشكى ىستەر ورگاندارىنا 2018-2021 جىلدار ارالىعىندا ورىن العان، وسى ءۇيدىڭ قىزمەتكەرىن ۇقت مۇشەلەرىنىڭ بىرنەشە رەت زورلاۋ فاكتىسى بويىنشا ماتەريال جىبەرىلگەنىن حابارلايمىز. رەيدەرلىك باسىپ الۋ فاكتىسى جانە ۇقت جۇمىس ىستەۋىنە ىقپال ەتكەن قاتىسۋشى تۇلعالاردى انىقتاۋ بويىنشا سوتقا دەيىنگى تەرگەۋ جالعاسىپ جاتىر»،- دەپ ءمالىم ەتتى اگەنتتىك.