«مۇقاعالي» ءفيلمى بەس جۇلدەگە يە بولدى

بەلگىلى كينورەجيسسەر بولات قالىمبەتوۆتىڭ «مۇقاعالي» كوركەم ءفيلمى شوتلانديادا وتكەن حالىقارالىق سەنت-ەندريۋس كينوفەستيۆالىندە بەس جۇلدەنى جەڭىپ الدى.

ش. ايمانوۆ اتىنداعى «قازاقفيلم» كينوستۋدياسىنىڭ باسپا ءسوز قىزمەتى ءمالىم ەتكەندەي، سەنت-ەندريۋس كينوفەستيۆالىندە «مۇقاعالي» كوركەم ءفيلمى بىردەن بەس جۇلدەگە يە بولدى. اتاپ ايتار بولساق، گران-پري، "ۇزدىك كينودراماتۋرگ"، "ۇزدىك كينورەجيسسەر"، "ۇزدىك وپەراتور" جانە "ۇزدىك اكتەر" اتالىمدارىنا لايىق دەپ تانىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«مۇقاعالي» كوركەم ءفيلمى ءبىر جىلدا 10 حالىقارالىق سىيلىققا يە بولدى. بۇل – بۇرىن-سوڭدى بولماعان وتە قۋانىشتى جاڭالىق. بارشا قازاق كينوسىن قادىرلەيتىن كورەرمەندەرگە العىسىمدى بىلدىرەمىن. قازاقتىڭ ۇلى اقىنىن ۇلىقتاعان فيلم جاستارعا تەك شابىت بەرسىن، مۇقاعالي اتامىزدىڭ ونەرىن دارىتسىن دەپ تىلەگىم كەلەدى. تاۋەلسىزدىك كۇنى قارساڭىندا الەمنىڭ بەلدى سىنشىلارى ءوز باعاسىن بەرگەن بۇل جۇلدەلەر – قازاق حالقىنىڭ ورتاق جەڭىسى»، - دەدى ءفيلمنىڭ رەجيسسەرى بولات قالىمبەتوۆ.

مادەنيەت جانە سپورت مينيسترلىگىنىڭ تاپسىرىسى بويىنشا شاكەن ايمانوۆ اتىنداعى «قازاقفيلم» كينوستۋدياسى تۇسىرگەن تۋىندىدا اتى اڭىزعا اينالعان قازاق اقىنى مۇقاعالي ماقاتايەۆتىڭ ءومىرىنىڭ سوڭعى جىلدارى تۋرالى باياندالادى.

قازاقستاندا فيلم 2021 جىلدىڭ 21 قازانىندا پروكاتقا شىققان بولاتىن. الەمدىك پرەمەراسى 25ء-شى (PÖFF) تاللين كينوفەستيۆالى اياسىندا ءوتتى، وندا قازاقستاندىق كارتينا ەكۋمەنيكالىق قازىلار القاسىنىڭ جۇلدەسىنە يە بولدى.