پارلامەنت ءماجىلىسىنىڭ دەپۋتاتتارى «كاسىبي بىلىكتىلىك تۋرالى» قازاقستان رەسپۋبليكاسى زاڭىنىڭ جوباسىن جانە وعان قاتىستى تۇزەتۋلەردى ءبىرىنشى وقىلىمدا ماقۇلدادى.
زاڭ جوباسىنا سايكەس، قازاقستاندا كاسىپتەر رەتتەلەتىن جانە رەتتەلمەيتىن بولىپ ەكىگە بولىنەدى. رەتتەلەتىندەر جۇمىسشىلاردىڭ مىندەتتى اتتەستاسياسىن تالاپ ەتەدى. بۇل ساناتقا نەگىزىنەن دارىگەرلەر، ءورت سوندىرۋشىلەر نەمەسە زاڭگەرلەردى قوسا العاندا، ازاماتتاردىڭ دەنساۋلىعى مەن قاۋىپسىزدىگىن قامتاماسىز ەتۋگە بايلانىستى كاسىپتەر كىرەدى. مەملەكەت رەتتەمەيتىن كاسىپتەر ءۇشىن اتتەستاسيا ەرىكتى بولادى، دەپ حابارلايدى Almaty-akshamy.kz Egemen.kz-كە سىلتەمە جاساپ.
«تاۋەلسىز اتتەستاتتاۋدان وتكەن ءبىلىم بەرۋ ۇيىمدارىنىڭ تۇلەكتەرىندە ناقتى ماماندىق بويىنشا كاسىپتىك وقۋدى اياقتاعانىن راستايتىن ديپلوم جانە العان ءبىلىمىن پراكتيكادا قولدانۋ داعدىلارىن راستايتىن سەرتيفيكات بولادى. جۇمىس بەرۋشىلەرگە سەرتيفيكاتى بار تۇلەكتەردى ەڭبەك وتىلىنە تالاپتار قويماي-اق جۇمىسقا قابىلداۋعا مۇمكىندىك بەرىلەدى»، - دەدى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا.
ءمينيستردىڭ ايتۋىنشا، ەرىكتى نەگىزدە اتتەستاتتاۋدى ءتۇرلى ۇيىرمەلەردە، ترەنينگتەردە نەمەسە ءوز بەتىنشە وقۋ ناتيجەسىندە جۇمىسشى ماماندىقتارىن يگەرگەن ادامدار الا الادى. بۇل جاعدايدا انىقتاما جۇمىسشى ماماندىقتارى بويىنشا جۇمىسقا ورنالاسۋ ءۇشىن نەگىزگى قۇجات بولا الادى.
سەرتيفيكاتتاۋ اقىلى نەگىزدە بەرىلەدى. جۇمىسسىز ازاماتتاردىڭ قىزمەتتەرىنە اقى تولەۋدى مەملەكەت دەربەستەندىرىلگەن ۆاۋچەرلەر ارقىلى، جۇمىس بەرۋشى ءوز قىزمەتكەرلەرىن اتتەستاسياعا جىبەرگەن كەزدە نەمەسە ازاماتتاردىڭ ءوز ەركىمەن بىلىكتىلىگىن باعالاۋدان وتكەن كەزدە تولەيدى.