اعىمداعى جىلدىڭ 4 جەلتوقسان كۇنى ساعات 14.00-دە مەملەكەتتىك قۋىرشاق تەاترى ەرەسەكتەرگە ارنالعان فيلوسوفيالىق استارى تەرەڭ، ادام جانىنىڭ قۇپيا الەمىن بەينەلەيتىن «مەن كىممىن؟» سپەكتاكلىنىڭ پرەمەراسىن كورەرمەن نازارىنا ۇسىنباق. قوعامداعى رۋحاني جالعىزدىق، ادامدىق كەلبەتتى جوعالتۋ، وز-وزىمەن ارپالىسۋ سەكىلدى ماڭىزدى تاقىرىپتاردى قوزعايتىن سپەكتاكل قۋىرشاق ونەرىنىڭ مۇمكىندىكتەرى ارقىلى جاڭا قىرىنان اشىلادى.
كوركەمدىك شەشىمى مەن يدەيالىق مازمۇنى تەرەڭ بۇل تۋىندى ادامنىڭ جان دۇنيەcىندەگى قاراما-قايشىلىقتاردى، سەنىم مەن كۇدىك اراسىنداعى كۇرەستى، ادام تابيعاتىنىڭ السىزدىگى مەن قۋاتىن سيمۆولدىق بەينەلەر ارقىلى جەتكىزەدى. باستى كەيىپكەردىڭ ىشكى جان ايقايى، قوعاممەن ۇيلەسە الماۋى جانە ءوزىن-وزى تانۋعا ۇمتىلىسى كورەرمەندى تەرەڭ ويعا جەتەلەيدى.
سپەكتاكلدىڭ رەجيسسەرى – الەمدىك قۋىرشاق تەاترى ونەرىندە وزىندىك قولتاڭباسى قالىپتاسقان، گۇرجىستان ەلىنەن ارنايى شاقىرتىلعان سۋرەتكەر نيكولوز ساباشۆيلي.
تەاتر ديرەكتورى المات امانگەلدى:
«مەن كىممىن؟» – قازىرگى قوعامداعى وزەكتى تاقىرىپتاردى كوتەرەتىن كورەرمەن سۇرانىسىنا ساي سپەكتاكل دەپ ويلايمىن. ءبىز بۇل تۋىندى ارقىلى كورەرمەندەرگە ادامدىق بولمىستىڭ مانىنە قايتا قاراۋعا ۇندەيمىز. قۋىرشاق تەاترى – تەك بالالارعا ارنالعان ونەر ەمەس، ول كەز كەلگەن كۇردەلى يدەيانى نازىك ءارى تەرەڭ جەتكىزە الاتىن ساحنالىق ءتىل. پرەمەرا كورەرمەنگە ەرەكشە اسەر، تەرەڭ وي جانە رۋحاني تولعانىس سىيلايدى دەپ سەنەمىز»، – دەپ اتاپ ءوتتى.
«مەن كىممىن؟» – قوعامداعى رۋحاني داعدارىس پەن ادامدىق بەت-بەينەنىڭ جوعالۋىن كوركەم تۇردە جەتكىزەتىن ەرەكشە سپەكتاكل.
وتەتىن ورنى: مەملەكەتتىك قۋىرشاق تەاترى، پۋشكين ك-سى 63