نوعايتى وزەنىندەگى سۋ دەڭگەيى تومەندەدى.
سۋ تاسقىنى قاۋپىنە بايلانىستى اتىراۋ وبلىسىنىڭ ساعىز اۋىلىنان ەۆاكۋاسيالانعان تۇرعىندار ۇيىنە ورالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، 30 ناۋرىزدا ساعات 22:00-دە نوعايتى وزەنى تاسىعان.
نوعايتى وزەنى اقتوبە وبلىسىنان باستالىپ، اتىراۋ وبلىسىنداعى ساعىز اۋىلى ارقىلى اعىپ، قوڭىرساي وزەنىنە قۇيىلادى. وزەننىڭ تاسۋىنا قاردىڭ ەرۋى سەبەپ بولعان. سۋ دەڭگەيى شامامەن 3 مەترگە كوتەرىلدى.
«سول سەبەپتەن، ساعىز اۋىلىنداعى بىرنەشە ءۇيدى سۋ باسۋ ءقاۋپى ءتوندى. تۇرعىنداردى قۇتقارۋ جۇمىسىنا توتەنشە جاعدايلار دەپارتامەنتىنىڭ (18 قىزمەتكەرى)، جەرگىلىكتى اتقارۋشى ورگاننىڭ (25 قىزمەتكەرى)، جەرگىلىكتى تۇرعىندار (100 ادام)، اۋداندىق پوليسيا ءبولىمىنىڭ (2 قىزمەتكەر 2 تەحنيكا)، «شانحاي كونتراكشن» ج ش س (3 قىزمەتكەر، 1 تيەگىش)، «اداي» جك (3 قىزمەتكەر 1 تيەگىش)، «ەربولات» جك (1 قىزمەتكەر، 1 تيەگىش) جانە «قازاقستان تەمىرجولى» (30 قىزمەتكەر) كومپانياسىنىڭ قاتىسۋىمەن تۇرعىنداردى جەرگىلىكتى مەكتەپ پەن كوللەدجگە ەۆاكۋاسيالاۋ جۇرگىزىلدى. ال وزەن جاعاسى قۇم ۇيىندىسىمەن بەكىتىلدى»، - دەپ حابارلادى دەپارتامەنتتىڭ باسپا ءسوز قىزمەتى.
ەۆاكۋاسيالانعان تۇرعىندار سانى – 50 ادام. ونىڭ ىشىندە 23 بالا بار.
«بۇگىن، 31 ناۋرىزدا، ساعات 09:00 شاماسىندا نوعايتى وزەنىندەگى سۋ دەڭگەيى تومەندەدى. سۋ باسۋ ءقاۋپى سەيىلگەننەن كەيىن ساعات 03:30-دا ەۆاكۋاسيالانعان تۇرعىندار ۇيىنە ورالدى»، - دەپ ءمالىم ەتتى دەپارتامەنتتەن.