ۇلكەن جانە كىشى الماتى سۋ الابىندا قار كوشكىنى ءجۇرۋى مۇمكىن.
الماتى قالاسىنىڭ توتەنشە جاعدايلار دەپارتامەنتىنىڭ ماماندارى قالا تۇرعىندارى مەن قوناقتاردى تاۋدا اباي بولۋعا شاقىردى، دەپ حابارلايدى Almaty-akshamy.kz.
«10-11 ناۋرىز ارالىعىندا جىلىمىقتىڭ اسەرىنەن جانە قار جامىلعىسىنىڭ تۇراقسىز بولۋىنا بايلانىستى ۇلكەن جانە كىشى الماتى سۋ الابىندا قار كوشكىنى ءجۇرۋى مۇمكىن. قيىن جاعدايعا ۇرىنباس ءۇشىن تاۋ بوكتەرىنە شىعۋعا تىيىم سالىنادى. تاۋدا اباي بولىڭىزدار»، - دەپ ەسكەرتەدى الماتى قالالىق تجد باسپا ءسوز قىزمەتى.
بۇدان باسقا، «قازسەلدەنقورعاۋ» مم جانە الماتى قالالىق تجد ماماندارى جۇرگىزگەن اەروۆيزۋالدى تەكسەرۋ بارىسىندا 3000 مەتردەن استام بيىك تاۋلى ايماقتا، ورتاشا تاۋلى ايماقتا، قار جامىلعىسىنىڭ تۇراقسىز جاعدايىنا بايلانىستى تاۋ بوكتەرىندە كوشكىن ءتۇسۋ ءقاۋپىن انىقتادى.
وعان قوسا، «بوگدانوۆيچ» مۇزدىعىنا اپاراتىن تۋريستىك سوقپاعىندا كوشكىن ءتۇسۋ ءقاۋپى جوعارى 12 ۋچاسكە بار.
تۋريستەر مەن قوناقتاردىڭ قاۋپسىزدىگىن، اپاتتاردىڭ الدىن الۋ ماقساتىندا ءوز قۇزىرەتى بويىنشا ۇڭگىردىڭ اۋماعىندا ءۇش تىلدە «ساق بولىڭىز!» «مۇزدىق قۇلاۋى مۇمكىن» دەگەن ارنايى تاسپالار، ەسكەرتۋ بەلگىلەرى ورناتىلدى.
وسىعان وراي، الماتى قالالىق تجد مەن «قازسەلدەنقورعاۋ» مەملەكەتتىك مەكەمەسى مىناداي ەسكەرتۋ جاريالادى:
- ەگەر تاۋدا بولساڭىز، مۇقيات بولىڭىز جانە اۋا رايىنىڭ وزگەرۋىن قاداعالاڭىز؛
- تاۋ بوكتەرىندە قاردىڭ جىلجۋىن، قاردىڭ تۇيىرشىكتەرىن بايقاساڭىز، وندا تاۋلارعا بارماعانىڭىز ءجون – بۇل قاردىڭ تۇراقسىز كۇيدە ەكەنىن، كوشكىن ءقاۋپىن بىلدىرەدى؛
- تاۋلى اۋماقتاردا قاۋىپسىزدىك شارالارىن ساقتاڭىز؛
- قارلى تىك جارتاستارعا شىقپاڭىز.