جاستارعا ماماندىق تاڭداۋعا كومەكتەسەدى.
قازاقستان ۇكىمەتى 2025 جىلعا دەيىن حالىقتىڭ تابىسىن ارتتىرۋدى كوزدەپ وتىر. ۇكىمەتتىڭ كەزەكتى وتىرىسىندا وسى ماقساتتا جاسالىپ جاتقان شارالار جايىندا ايتىلدى، دەپ حابارلايدى Almaty-akshamy.kz.
«ءبىزدىڭ قاتىسۋىمىزبەن بارلىعى 33 ءىس-شارا قاراستىرىلعان، ونىڭ 16-سىن تىكەلەي مينيسترلىكپەن جۇزەگە اسىراتىن بولادى. بۇل شارالار كۇنكورىس دەڭگەيىنەن تومەن تابىس تاباتىن حالىقتىڭ ۇلەسىن ازايتۋ، جۇمىسسىزدىق كولەمىن تومەندەتۋ، 2025 جىلعا دەيىن 2 ميلليونداي جاڭا جۇمىس ورىندارىن قۇرۋدى كوزدەيدى»، – دەدى ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ.
ونىڭ ايتۋىنشا، جاڭا جۇمىس ورىندارىن قۇرۋ بويىنشا جۇمىس شەڭبەرىندە ەڭبەكمينى فريلانسەرلەر قىزمەتىن سيفرلىق فورماتقا كوشىرۋ ماقساتىندا «پلاتفورمالىق جۇمىس» ەلەكتروندىق سەرۆيسىن ازىرلەۋدە. بۇل ءوزىن-وزى جۇمىسپەن قامتىعان ازاماتتاردىڭ قىزمەتىن ءتۇرلى پلاتفورمالاردا وڭاي تىركەۋگە، قاجەتتى مامانداردى تەز تابۋعا، ەڭبەك قۇقىقتارىن قورعاۋعا جانە تاپسىرىس بەرۋشىلەرمەن قارىم-قاتىناستى رەسمي تۇردە راسىمدەۋگە مۇمكىندىك بەرەدى.
بۇدان باسقا، 3 جانە 4 ساناتتار بويىنشا (ماماندار مەن بىلىكتى جۇمىسشىلار) شەتەلدىك جۇمىس كۇشىن تارتۋعا كۆوتا 4،7 مىڭ ادامعا قىسقارتىلدى.
«جاڭا جۇمىس ورىندارىن قۇرۋ وڭىرلىك جۇمىسپەن قامتۋ كارتالارىن وزەكتەندىرۋ جانە اقپاراتتىق جۇيەنى تۇراقتى جاڭارتۋ ارقىلى باقىلانادى»، – دەپ تولىقتىردى سەرىك شاپكەنوۆ.
حالىقتى جۇمىسپەن قامتۋعا جاردەمدەسۋ باعىتى بويىنشا اقپاراتتىق جۇيەلەردى ساراپتاۋ ناتيجەسىندە الەۋمەتتىك قولداۋعا جانە جۇمىسپەن قامتۋعا مۇقتاج ازاماتتاردى «ەرتە انىقتاۋ جۇيەسى» ەنگىزىلەتىن بولادى. بۇل رەتتە وتباسىنىڭ سيفرلىق كارتاسى ارقىلى الەۋمەتتىك مارتەبەسى جوق، قولداۋعا مۇقتاج ازاماتتاردىڭ پورترەتى ازىرلەنەدى جانە ولاردىڭ ناقتى قاجەتتىلىكتەرى ايقىندالادى.
سونداي-اق، جاستارعا ارنالعان «العاشقى جۇمىس ورنى»، تۇلەكتەرگە ارنالعان «جاستار پراكتيكاسى»، «ۇرپاقتار كەلىسىمشارتى» جوبالارى شەڭبەرىندە سۋبسيديالاۋدىڭ ۇزاقتىعى مەن مولشەرى ۇلعايتىلاتىن بولادى.
جاستاردى جۇمىسقا ىنتالاندىرۋ ءۇشىن زاڭناماعا «جاس جۇمىسشى» ۇعىمىن ەنگىزۋ، ولار ءۇشىن سىناق مەرزىمىن الىپ تاستاۋ، باسقا وڭىرلەردەن جۇمىسقا كەلگەن جاستار ءۇشىن تۇرعىن ءۇيدى جالعا الۋعا كوتەرمە جاردەماقى ەنگىزۋ جونىندە شارالار قابىلداناتىن بولادى.
كوپ بالالى وتباسىلار (76،8 مىڭ) جانە مۇگەدەك بالالاردى تاربيەلەپ وتىرعان وتباسىلار (7 مىڭ) ءۇشىن بارلىق وڭىرلەردە ايەلدەردى قولداۋ ورتالىقتارىن قۇرۋ جوسپارلانۋدا.
«بۇل شارالار ناقتى قاجەتتىلىكتەر بويىنشا الەۋمەتتىك قولداۋعا مۇقتاج ازاماتتاردى انىقتاۋعا، جاستاردىڭ جۇمىسپەن قامتىلۋىن قامتاماسىز ەتۋگە، بالالى وتباسىلارعا كومەك كورسەتۋگە مۇمكىندىك بەرەدى»، – دەپ اتاپ ءوتتى سەرىك شاپكەنوۆ.
كاسىپتىك داعدىلاردى دامىتۋ جانە ەڭبەك رەسۋرستارىن كاسىپتىك باعدارلاۋ باعىتى بويىنشا جۇمىس بەرۋشىلەرمەن بىرلەسىپ، كاسىپورىندار جانىنداعى وقۋ ورتالىقتارىنىڭ بازاسىندا جاپپاي قايتا دايارلاۋ جانە بىلىكتىلىكتى ارتتىرۋ «فابريكالارى» قۇرىلاتىن بولادى. جاستاردى وقىتۋعا جانە سۇرانىسقا يە ماماندىقتار بويىنشا كادرلار دايارلاۋعا ەرەكشە نازار اۋدارىلاتىن بولادى.
«سونداي-اق، سۇرانىسقا يە داعدىلاردى تانۋ جۇيەسى ەنگىزىلۋدە. مەملەكەت باسشىسىنىڭ تاپسىرماسى بويىنشا ەڭبەكمينى «ۇلتتىق بىلىكتىلىك جۇيەسى تۋرالى» زاڭ جوباسىن ازىرلەۋدە. ونىڭ شەڭبەرىندە بىلىكتىلىكتى تانۋدىڭ تاۋەلسىز ورتالىقتارىن قۇرۋ ءۇشىن ءتيىمدى جاعدايلار جاساۋ، جىل سايىنعى سەرتيفيكاتتاۋدان ءوتۋ ءۇشىن ىزدەنۋشىلەرگە كەمىندە 1000 ۆاۋچەر ۇسىنۋ كوزدەلەدى. Skills.enbek.kz پلاتفورماسىندا ونلاين وقۋ ارقىلى جاڭا ءبىلىم مەن داعدىلاردى يگەرۋگە جاعداي جاسالادى. وقۋشىلار مەن جاستار اراسىندا كاسىپتىك باعدارلاۋدى ۇيىمداستىرۋ ءۇشىن مانساپتىق ىلگەرىلەۋ بويىنشا كەمىندە 100 نۇسقاۋلىق ازىرلەنەتىن بولادى»، – دەپ تولىقتىردى سەرىك شاپكەنوۆ.
سونىمەن قاتار، سۇرانىسقا يە ماماندىقتار ءتىزىمى جىل سايىن جاڭارتىلىپ وتىرادى.
«بۇل شارالار جۇمىس بەرۋشىلەردىڭ سۇرانىسى بويىنشا كادرلار دايارلاۋعا، جاستاردى ەڭبەك نارىعىندا سۇرانىسقا يە ماماندىقتار مەن داعدىلار تۋرالى حاباردار ەتۋگە، ولارعا ماماندىق تاڭداۋدا قولداۋ كورسەتۋگە مۇمكىندىك بەرەدى»، – دەپ تۇيىندەدى ەڭبەكمينىنىڭ باسشىسى.