مەملەكەت باسشىسى قاسىم-جومارت كەمەل ۇلى توقايەۆ كەشەگى جولداۋىندا ءومىردىڭ، قوعامنىڭ بارلىق سالاسىن تۇگەل قامتىدى. جان-جاقتى سارالاپ، ولاردىڭ شەشۋ جولدارىن كورسەتىپ بەردى.
جاسىراتىنى جوق، بۇكىل جاھاندى ۋىسىندا ۇستاپ تۇرعان كوروناۆيرۋس ىندەتى ءبىزدى ءومىر ءسۇرۋ داعدىمىزدان ءبىراز جاڭىلدىرىپ، كوپ سالاعا كولەڭكەسىن تۇسىرگەنى راس. ەڭسەمىزدى ەندى تىكتەپ جاتقاندايمىز. دەگەنمەن ءالى دە بۇرىنعى مامىراجاي، قالىپتى كۇندەرىمىزگە ەركىن ورالا الماي وتىرمىز.
«الداعى ۋاقىتتا الەمدە كوروناۆيرۋستىڭ جاڭا شتامدارى شىعۋى مۇمكىن. ساراپشىلار باسقا ىندەتتەر پايدا بولاتىندىعىن ايتۋدا. ءبىز ونىڭ قاشان بولاتىندىعىن كۇتىپ قاراپ وتىرا المايمىز. وسىنداي جاعدايدا ءومىر سۇرۋگە، ءارى قاراي دامۋعا بەيىمدەلۋىمىز كەرەك. ءقازىر بىزگە كەرەك ۆاكسينانى ساتىپ الۋ وتە ماڭىزدى. دۇنيەجۇزىلىك دەنساۋلىق ساقتاۋ ۇيىمىندا تىركەلگەن ۆاكسينالاردى تەزىرەك ساتىپ الۋ قاجەت. سونىمەن بىرگە بۇكىل دەنساۋلىق ساقتاۋ سالاسىن تۇراقتى ەكپە الۋ جۇيەسىنە دايىنداعان ءجون»، – دەدى مەملەكەت باسشىسى.
سونىمەن قاتار، ەلىمىزدىڭ بيولوگيالىق قاۋىپسىزدىگىن بولجاۋمەن اينالىساتىن ۇلتتىق جۇيە قۇرىلۋعا ءتيىس دەدى.
«بۇل ءىس-شارا ءتيىستى زاڭ جوباسىندا قاراستىرىلعان. پارلامەنتتەن وسى زاڭ جوباسىن قازىرگى سەسسيانىڭ سوڭىنا دەيىن قابىلداۋدى سۇرايمىن. مەديسينالىق ساراپتاما جاسايتىن كوپتەگەن زەرتحانامىز حالىقارالىق ستاندارتقا ساي ەمەس. دەنساۋلىق ۇلت جوباسى بويىنشا كەمىندە 12 زەرتحانانى جوعارى تەحنولوگيالىق قۇرالمەن جابدىقتاۋ قاجەت. سونىڭ ارقاسىندا زەرتحانالارىمىز 90 پايىزعا دەيىن حالىقارالىق تالاپقا ساي جۇمىس ىستەيتىن بولادى»، – دەدى مەملەكەت باسشىسى.
پرەزيدەنت مەديسينا ونىمدەرىن زەرتحانالىق جانە تەحنيكالىق سىناقتان وتكىزەتىن ورتالىق قۇرۋ كەرەكتىگىن دە اتاپ ءوتتى.
«فارماسيەۆتيكا ونەركاسىبىنە ەرەكشە كوڭىل ءبولۋ قاجەت. ىندەتپەن كۇرەس كەزىندە ءدال سالا ەلىمىزدىڭ باسەكەگە قابىلەتى مەن قاۋىپسىزدىگى ءۇشىن ماڭىزدى ەكەنىنە كوزىمىز جەتتى. سوندىقتان مەديسينا ونىمدەرىن زەرتحانالىق جانە تەحنيكالىق سىناقتان وتكىزەتىن ورتالىق قۇرۋىمىز كەرەك. جاھاندىق فارماسيەۆتيكالىق كورپوراسيالارمەن ىنتىماقتاستىقتى جانداندىرعان ءجون. ينۆەستورلاردى تارتىپ، وزىق تەحنولوگيانى جانە وسى سالاداعى جاڭا زەرتتەۋ جۇمىستارىن يگەرۋدى قولعا الۋ كەرەك»، – دەگەن مەملەكەت باسشىسى وتاندىق تاۋار وندىرۋشىلەرمەن جاسالاتىن offtake كەلىسىمشارتتارىنىڭ كولەمىن ارتتىرىپ، ءونىم ءتۇرىن كوبەيتۋ قاجەتتىگىن دە باسا ايتتى.
بىزدەگى دارى-دارمەك پەن مەديسينالىق قۇرال-جابدىقتىڭ 17 پايىزى عانا وتاندىق ءونىم. 2025 جىلى ونى 50 پايىزعا جەتكىزۋ قاجەتتىگىن تىلگە تيەك ەتتى.
ۇلت دەنساۋلىعى مىقتى بولسا، ەل دە، جەر دە امان بولادى.