باس پروكۋرور: اۋەجايلار ماڭىندا جەم ىزدەگەن قۇستار جينالاتىن 350 عيمارات زاڭسىز سالىنعان. قازاقستاندا قوستاناي اۋەجايىنىڭ ماڭىنداعى اۋە ايلاعى عانا تالاپقا ساي كەلەدى. ويتكەنى، وزگە وڭىرلەردە اۋەجاي ماڭىنا تاياۋ رۇقساتسىز سالىنعان عيماراتتار كوپ، دەپ حابارلايدى almaty-akshamy.kz Aikyn.kz -كە سىلتەمە جاساپ.
وزگە ايماقتاردىڭ اۋەجايى ماڭايىندا ازاماتتىق اۆياسيا كوميتەتىنىڭ رۇقساتىنسىز 100 مىڭنان استام عيمارات زاڭسىز سالىنعان. بۇل تۋرالى باس پروكۋرور بەرىك اسىلوۆتىڭ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتىلعان.
«ق ر اۋە كەڭىستىگىن پايدالانۋ جانە اۆياسيا قىزمەتى تۋرالى» زاڭنىڭ 90-بابىنىڭ 4-تارماعىنا سايكەس اۋە ايلاعىنىڭ باقىلاۋ نۇكتەسىنەن ون بەس شاقىرىم جاقىن قاشىقتىقتا تاعام قالدىعىن تاستايتىن ورىنداردى، اڭ-قۇس فەرمالار، قاساپحانالار جانە قۇستار توپتالاتىن باسقا دا نىسانداردى سالۋعا تىيىم سالىنادى. تىيىم سالۋعا قاراماستان، اۋەجايلاردىڭ ماڭىندا جەمتىك ىزدەگەن قۇستار جينالاتىن 350 وبەكتى سالىندى. اۋەجايلاردىڭ جانىنداعى قوقىس پوليگوندارى اۋە تاسىمالىنىڭ قاۋىپسىزدىگىن ناشارلاتقان. مىسالى، الماتى قالاسىنىڭ اۋەجاي ايماعىندا وسىنداي 10-نان استام نىسان جۇمىس ىستەيدى. ازاماتتىق اۆياسيا كوميتەتىنىڭ ماقۇلداۋىنسىز شىمكەنت قالاسى اۋەجايىنىڭ 4 شاقىرىم اينالاسىندا 1 303 نىسان سالىندى. وسىنداي فاكتىلەر ەلىمىزدىڭ بارلىق وڭىرىندە (قوستاناي وبلىسىن قوسپاعاندا – رەد.) انىقتالدى. ءتيىستى كەلىسىمسىز 100 مىڭنان استام ءتۇرلى قۇرىلىس نىسانى سالىندى»، – دەپ جاۋاپ بەرگەن بەرىك اسىلوۆ.