وتكەن جىلدىڭ قاراشا، جەلتوقسان ايلارىندا كەڭەس وداعىنىڭ باتىرى، گۆارديا پولكوۆنيگى باۋىرجان مومىش ۇلى اتىنداعى 5571 اسكەري بولىمىنە ەلىمىزدىڭ تۇكپىر-تۇكپىرىنەن جاس ساربازدار ءتۇستى. ولار ەكى ايعا جۋىق وقۋ پۋنكتىندە اسكەري ءىستىڭ نەگىزى بويىنشا ءبىلىم الدى.
اسكەر قاتارىنا شاقىرىلعان جاس ساربازدار جان-جاقتى دايىندىقتان وتكەن سوڭ، جاۋىنگەرلىك قىزمەتكە رەسمي تۇردە قابىلداندى. اسكەري ءبولىم كومانديرى، پولكوۆنيك باقداۋلەت وسپانبەكوۆ ءىس-شارانى اشىق دەپ جاريالاعان سوڭ، وركەستردىڭ سۇيەمەلدەۋىمەن مەملەكەتتىك گيمن شىرقالىپ، ەلىمىزدىڭ كوك بايراعى كوتەرىلدى. مەملەكەتتىك تۋدى كوتەرۋ قۇقىعى جاۋىنگەرلىك قىزمەتتىڭ ۇزدىك ساربازى قاتارداعى جاۋىنگەر سۇلتانبەك سەرىكۇلىنا بەرىلدى.
ادەتتەگىدەي ساپقا جينالعان جەكە قۇرامنىڭ الدىندا بريگادا كومانديرى، پولكوۆنيك باقداۋلەت وسپانبەكوۆ جاۋىنگەرلىك قىزمەتتىڭ ماڭىزى مەن ولارعا ارتاتىن جاۋاپكەرشىلىگى تۋرالى ايتىپ ءوتتى. سونداي-اق زاڭدىلىق پەن اسكەري جارعى تالاپتارىن قاتاڭ ساقتاۋدى، حالىققا قالتقىسىز قىزمەت ەتۋدى تاپسىردى.
اسكەري ءبولىم ارداگەرى، وتستاۆكاداعى پولكوۆنيك الەكساندر زەلينسكيي بۇگىنگى سالتاناتپەن قۇتتىقتىپ، جاۋىنگەرلەرگە قىزمەتتەرىنە ساتتىلىك تىلەدى. زەينەتكە شىقسا دا، اسكەري ءبولىمنىڭ ومىرىمەن ءالى دە بىتە قايناسىپ جۇرگەن زەينەتكەر تاربيەشى-وفيسەردىڭ اقىل-كەڭەسى مەن ىزگى تىلەگى جاس جاۋىنگەرلەردى قاناتتاندىرا ءتۇستى. سونىمەن قاتار، اسكەري ءبولىمنىڭ قىزمەتىنە تىكەلەي قاتىستى، ءوزارا بىرلەسىپ قىزمەت اتقاراتىن الماتى قالاسىنىڭ ىشكى ىستەر دەپارتامەنتىنەن دە قىزمەتكەر كەلدى. مەدەۋ اۋداندىق پوليسيا باسقارماسىنىڭ اعا ينسپەكتورى پوليسيا اعا لەيتەنانتى نۇرسۇلتان نۇرجانوۆ قۇتتىقتاۋ ءسوز سويلەپ، جاس ساربازداردىڭ قوعامدىق ءتارتىپتى ساقتاۋداعى جاۋىنگەرلىك قىزمەتتەرىن ادال اتقاراتىندارىنا زور سەنىم بىلدىرەتىنىن ايتتى.
ەكى ايلىق دايىندىقتان ءوتىپ، العاشقى جاۋىنگەرلىك قىزمەتكە شىققالى تۇرعان جاۋىنگەردىڭ ءبىرىن سوزگە تارتتىق.
«بۇگىن مەنىڭ ومىرىمدەگى وتە قۋانىشتى ءارى جاۋاپتى كۇن. ءبىز العاش رەت جاۋىنگەرلىك قىزمەتكە شىققالى تۇرمىز. جاس ساربازدار وسى كۇنگە دەيىن تەوريالىق جانە تاجىريبەلىك تۇرعىدان العان بىلىمدەرىن ءىس جۇزىندە كورسەتۋلەرى كەرەك. «جاۋىنگەرلىك جانۇياداي ۇيىسقان، ۇلتتىق ۇلان – ەلى مەن حالقىنا قورعان!» دەگەن ۇرانمەن وڭتۇستىك استانامىز – الماتى قالاسىنىڭ اۋداندارىنداعى قوعامدىق ءتارتىپتى قاداعالاۋ ماقساتىندا قىزمەتكە شىقپاقپىز. باتىر اتامىز باۋىرجان مومىش ۇلىنىڭ «ءتارتىپسىز ەل بولماس، تارتىپكە باعىنعان قۇل بولماس» دەگەن سوزدەرىنە سۇيەنەر بولساق، بىزگە ەڭ الدىمەن كەرەگى – تەمىردەي ءتارتىپ، قىرانداي قىراعىلىق جانە جالىنداعان جاۋىنگەرلىك رۋح دەپ ويلايمىن. وسى ايتىلعان ءۇش قاسيەتتى ساقتاي وتىرىپ، قىزمەت اتقارار بولساق، قالا تىنىشتىعى تۇراقتى بولادى دەپ سەنىممەن ايتار ەدىم»، – دەپ اعىنان جارىلدى ءبولىمنىڭ جەدەل ماقساتتاعى 2-روتانىڭ قاتارداعى ساربازى دىنمۇحامەد جالعاس.
ول – اسكەرگە قازاقستاننىڭ باتىس وڭىرىنەن كەلگەن ۇلان.
بارلىق ساربازدىڭ دا كوكەيىندە وسى ماقسات، تىلەك تۇردى دەپ سەنەمىز.