بۇل تۋرالى №2 قالالىق بالالار كلينيكالىق اۋرۋحاناسىنىڭ باسپا ءسوز قىزمەتى حابارلادى.
الماتى قالاسى №2 بالالار قالالىق كلينيكالىق اۋرۋحاناسىنا شۇعىل جاعدايدا تۇسكەن بالا ءۇش ساعات بۇرىن اۋزىنا سالىپ شايناپ وتىرعان قالامنىڭ سەرىپپەسىن كۇلگەن كەزدە جۇتىپ قويىپ، ول تىنىس الۋ جولدارىنا تۇسكەن، دەپ حابارلايدى Almaty-akshamy.kz
ءبىراز ۋاقىتتان كەيىن بالانىڭ تىنىس الۋى قيىنداپ، جوتەلە بەرگەن. اتا-اناسى ونى №2 بالالار قالالىق كلينيكالىق اۋرۋحاناسىنىڭ «جەدەل جاردەم» بولىمشەسىنە جەتكىزەدى. بالانى ماماندار تەكسەرىپ، كەۋدە قۋىسىنىڭ رەنتگەنوگرافياسى جاسالادى. رەنتگەنوگراممادا وڭ جاق برونحتا بوگدە زات بار ەكەنى ءمالىم بولادى. اۋرۋحاناعا جاتقىزىلىپ، مانيپۋلياسياعا دايىندالادى.
جالپى انەستەزيامەن قاتاڭ تراحەبرونحوسكوپيا جاسالدى. وڭ جاق نەگىزگى برونحتان بوگدە دەنە (سەرىپپە) انىقتالدى. ايتا كەتۋ كەرەك، نەگىزگى برونحتاردىڭ بوتەن دەنەلەرىن دياگنوستيكالاۋ قيىن بولىپ كەلەدى. سەرىپپە ارنايى «كروكوديل» قىستىرعىشىمەن الىنادى. بالا 4 كۇننەن كەيىن ۇيىنە شىعارىلدى.
№2 بالالار قالالىق كلينيكالىق اۋرۋحاناسىنىڭ حيرۋرگيالىق بولىمشەسىنىڭ مەڭگەرۋشىسى مارات قاپتاعايەۆ اتاپ وتكەندەي، «تىنىس الۋ جولدارىنىڭ بوگدە دەنەلەرى بالالاردا ءجيى كەزدەسەتىن پاتولوگيا بولىپ تابىلادى. كوبىنە مۇنداي جاعداي 1-15 جاس ارالىعىنداعى بالالار اراسىندا كەزدەسەدى. بالالاردا 70-80% جاعدايدا بوتەن دەنەلەر تراحەيا مەن برونحتارعا «تايىپ»، تىنىس الۋ جولدارىنىڭ ءىشىنارا نەمەسە تولىق بىتەلۋىنە اكەلەدى. باسقا جاعدايلاردا بوگدە زات داۋىس بايلامدارىنىڭ ۇستىندە، جۇتقىنشاق، كەڭىردەك دەڭگەيىندە بەكىتىلەدى. ۇلكەن بوتەن دەنەلەر جوتەلدى، اسفيكسيانى تۋدىرادى، سويلەۋ بۇزىلىسى قاۋىپىنا اكەلۋى مۇمكىن جانە بالانىڭ ومىرىنە ءقاۋىپ توندىرەدى. تراحەيانىڭ تولىق بىتەلۋى نەمەسە لارينگوسپازم بولعان جاعدايدا ولىمگە اكەلۋى مۇمكىن. مۇنداي جاعدايلاردا تەك شۇعىل مەديسينالىق كومەككە جۇگىنۋ قاجەت، سوندا عانا قايعىلى جاعدايدى بولدىرماۋعا مۇمكىندىك بولادى.
برونحتىڭ بوتەن دەنەلەرىن ەمدەۋ بوتەن دەنەلەردى الىپ تاستاۋدان تۇرادى، ءبىراق بۇل ءار كەزدە ءساتتى بولا بەرمەيدى. كىشكەنتاي برونحتا تۇرىپ قالعان ۇساق بوتەن دەنەلەر كوبىنەسە ىدىرايدى، سۇيىلادى جانە وزدىگىنەن جويىلادى، سونىمەن قاتار ولار قابىنۋ اسقىنۋلارى بولۋى مۇمكىن.
تىنىس الۋدىڭ ايقىن بۇزىلۋى بولماعان جاعدايدا، ناۋقاستىڭ جاعدايى تراحەبرونحوسكوپيانى شۇعىل ەمەس، بەلگىلى ءبىر ۋاقىتتا جاساۋعا كەلسە نەمەسە كەرىسىنشە، پاسيەنت شارشاسا، جالپى جاعدايىن، جۇرەك قىزمەتىن ءبىرشاما تۇزەتۋ قاجەت بولعان كەزدە، بوتەن دەنەنى الىپ تاستاۋ 24-48 ساعاتقا كەشىكتىرىلۋى مۇمكىن.
بوتەن دەنەلەردى الىپ تاستاعاننان كەيىن كەيبىر ناۋقاستارعا وڭالتۋ شارالارىن جاساۋ قاجەتتىلىگى بولادى، ال اسقىنعان بوگدە دەنەلەردى الىپ تاستاعاننان كەيىن ميكروبقا قارسى پرەپاراتتاردى پروفيلاكتيكا رەتىندە قولدانۋ قاجەت.
بولجام كوبىنەسە ناۋقاستىڭ جاسىنا بايلانىستى. بۇنداي جاعداي نارەستەلەر مەن ءومىردىڭ العاشقى جىلدارىنداعى بالالار ءۇشىن وتە اۋىر. دارىگەر توسقاۋىلداردى كۇشەيتۋ قاۋپىنە بايلانىستى بالالارداعى بوتەن دەنەنى قولمەن الىپ تاستاۋعا بولمايتىنىن ەسكە سالدى!
تىنىس الۋ جولدارىندا بوگدە زات بار بارلىق بالانى جان ساقتاۋ جانە كەۋدە حيرۋرگياسى نەمەسە برونحوسكوپيا جاساۋعا بولاتىن پۋلمونولوگيا بولىمشەسى بار اۋرۋحاناعا جاتقىزۋ كەرەك.
«ساق بولىڭىزدار! بالاعا تاماق ءىشۋ كەزىندە سويلەسۋگە، كۇلۋگە، جۇگىرۋگە رۇقسات بەرمەڭىز. كىشكەنتاي بالالارعا ۇساق ويىنشىقتار مەن ويىنشىق بولشەكتەرىن، ساعىزدى اۋزىنا سالۋعا جول بەرمەڭىزدەر»، – دەيدى بالالار حيرۋرگتەرى.