ۇلىتاۋ وبلىسىندا جۇمىسشى ماماندىقتارعا سۇرانىس كۇرت ارتتى. اسىرەسە، قۇرىلىسشى، سانتەحنيك جانە اسپاز سياقتى تەحنيكالىق باعىتتاعى كادرلاردىڭ تاپشىلىعى سەزىلۋدە. وسىعان بايلانىستى بيىل مەملەكەت تاراپىنان تەگىن ءبىلىم الۋعا بولىنەتىن گرانتتار سانى ەداۋىر ۇلعايىپ وتىر.
جاڭا وقۋ جىلىنا ۇلىتاۋ وڭىرىندە جۇمىسشى ماماندىقتارعا 2250 گرانت قاراستىرىلعان. بۇل – وتكەن جىلمەن سالىستىرعاندا ايتارلىقتاي جوعارى كورسەتكىش. ءقازىردىڭ وزىندە وڭىردەگى تەحنيكالىق جانە كاسىپتىك ءبىلىم بەرۋ مەكەمەلەرىندە تالاپكەرلەردەن قۇجات قابىلداۋ ناۋقانى ءجۇرىپ جاتىر. جاس ماماندار تەك ءبىلىم الىپ قانا قويماي، ناقتى وندىرىستىك تاجىريبەدەن ءوتىپ، جۇمىسقا ورنالاسۋعا مۇمكىندىك الادى.
بۇگىنگى تاڭدا وڭىردەگى 150-دەن استام كاسىپورىن مەن كوللەدجدەر اراسىندا ارىپتەستىك جونىندە مەموراندۋم جاسالدى. بۇل قۇجاتتار نەگىزىندە ستۋدەنتتەر وندىرىستىك تاجىريبەدەن ءوتىپ، كەيىن جۇمىسقا ورنالاسۋ مۇمكىندىگىنە يە بولادى. بۇل شارا جاستاردىڭ ماماندىقتى يگەرۋ بارىسىندا ناقتى داعدىنى مەڭگەرىپ، ەڭبەك نارىعىنا تەز بەيىمدەلۋىن قامتاماسىز ەتەدى.
ۇلىتاۋ وبلىسىنداعى تەحنيكالىق جانە كاسىپتىك ءبىلىم بەرۋ مەكەمەلەرىنىڭ ماتەريالدىق-تەحنيكالىق بازاسى دا زامان تالابىنا ساي جاڭارتىلىپ كەلەدى. وقۋ ورىندارىنا قازىرگى زامانعا لايىقتى وقۋ قۇرالدارى مەن سيمۋلياسيالىق قۇرىلعىلار ساتىپ الىنۋدا. بۇل – ءبىلىم بەرۋ ساپاسىن ارتتىرىپ قانا قويماي، ستۋدەنتتەردىڭ تاجىريبەلىك ماشىقتارىن جەتىلدىرۋگە سەپتىگىن تيگىزەدى.