«قالالارعا قۇرىلىس كودەكسى ەمەس، قالا قۇرىلىسى كودەكسى كەرەك» دەيدى باسقوسۋعا قاتىسقان ساراپشىلار.
«الماتىباسجوسپار» عزي الاڭىندا «ساۋلەت، قالا قۇرىلىسى جانە قۇرىلىس قىزمەتىنىڭ نورماتيۆتىك-قۇقىقتىق سالاسىنداعى سوڭعى وزگەرىستەر» تاقىرىبىمەن وتكەن «دوڭگەلەك ۇستەل» ۇلگىسىندەگى جيىندا قالا قۇرىلىسى سالاسىنىڭ ساراپشىلارى قۇرىلىس كودەكسىنىڭ ولقىلىقتارىن تالقىلاپ، وي-پىكىر، ۇسىنىستارىن ورتاعا سالدى. جيىندى جۇرگىزۋشى قازاقستان قالا قۇرىلىسشىلارى وداعىنىڭ پرەزيدەنتى، ساۋلەتشى ليۋبوۆ نىسانبايەۆا اتالعان كودەكس جوباسىندا اۋماقتىق جوسپارلاۋ، قالا قۇرىلىسىن ايماقتارعا ءبولۋ جانە اۋماقتى جوسپارلاۋ نەگىزىندە اۋماقتىڭ كەشەندى ءارى تۇراقتى دامۋىن قامتاماسىز ەتۋگە بايلانىستى قالا قۇرىلىسى قىزمەتىنىڭ مىندەتى مەن قاعيداتى جوقتىعىن العا تارتتى.
«قالا قۇرىلىسى بلوگى باسىمدىققا يە بولۋعا ءتيىس. كودەكستە كولىكتىك، الەۋمەتتىك، ينجەنەرلىك قۇرىلىمدى جوبالاۋدىڭ بارلىق قاعيداتى، تاريحي مۇرا، جاسىل قاڭقا، ەكولوگيالىق جانە سەيسميكالىق قاۋىپسىزدىكتى ساقتاۋ باسىمدىقتارى، جوبالاۋ مەن ىسكە اسىرۋ كەزىندە جۇرتشىلىقپەن، ەلدىمەكەن تۇرعىندارىمەن ءوزارا ءىس-قيمىلدا جازىلۋى قاجەت»، -- دەپ اتاپ ايتتى ل.نىسانبايەۆا.
«...بۇعان قوسا، كودەكستىڭ اتاۋىن «قۇرىلىس كودەكسىنە» وزگەرتۋ ونىڭ قولدانىلۋ اياسىن تارىلتادى. ويتكەنى «قۇرىلىس» تەرمينى ساۋلەت جانە قالا قۇرىلىسى سالاسىن قامتىمايدى» دەيدى ساراپشىلار. بيىلعى 17 قاڭتاردا ق ر پارلامەنت دەپۋتاتتارى ق ر قۇرىلىس كودەكسى جۇمىسىن قابىلداعان بولاتىن. كودەكس پەن ىلەسپە زاڭداردىڭ جوباسى ساۋلەت پەن قالا قۇرىلىسىنىڭ پروگرەسسيۆتى جانە جۇيەلى تەتىكتەرىن بەلگىلەۋگە، قۇرىلىستىڭ بارلىق كەزەڭىن ونلاين رەجيمدە باقىلاۋعا مۇمكىندىك بەرەتىن ە-قۇرىلىس اقپاراتتىق جۇيەسىن ەنگىزۋگە باعىتتالعان. دەسەك تە، ساراپشىلاردىڭ پىكىرىنشە، كودەكس ايتارلىقتاي جەتىلدىرۋدى قاجەت ەتەدى.
الماتى قالاسى كاسىپكەرلەر پالاتاسىنىڭ ديرەكتورى، قالالىق ءماسليحاتتىڭ قۇرىلىس، ساۋلەت، ۋربانيستيكا جانە جەر قاتىناستارى جونىندەگى تۇراقتى كوميسسياسىنىڭ ءتوراعاسى نۇرسۇلتان شوقانوۆ قالا قۇرىلىسى كودەكسىنىڭ قالالار ينفراقۇرىلىمى مەن تىنىس-تىرشىلىگىن دامىتۋ ءارى جاقسارتۋعا نەگىز ەكەنىن، سونىمەن قاتار قوعام مەن بيزنەستىڭ كوپتەگەن مۇددەسىن قوزعايتىنىن اتاپ ءوتتى.
«بۇل جاعدايدا قۇجاتپەن جۇمىس ىستەۋ قيىندىق تۋعىزادى. سوندىقتان، ماڭىزدى قۇجات كاسىبي قاۋىمداستىق، نارىق سۋبەكتىلەرى مەن جالپى جۇرتشىلىقتىڭ تالقىسىنا ءتۇسىپ، ونى تولىق قايتا وڭدەۋ تالاپ ەتىلەدى. ءتيىمدى جۇمىس ىستەۋ ءۇشىن قالا جوسپارلاۋشىلارىنا، ساۋلەتشىلەرگە، ديزاينەرلەرگە، ساراپشىلار مەن قۇرىلىسشىلارعا ناقتى الگوريتم مەن بىلىكتى زاڭ قاجەت. دەگەنمەن، ەلىمىزدەگى قۇرىلىس سالاسى ونداعان قولدانىستاعى زاڭ مەن زاڭعا تاۋەلدى اكتىلەر جيىنتىعىنان بيىك بولاتىن ناقتى رەتتەۋشى تەتىككە يە ەمەس»، -- دەيدى ن.شوقانوۆ.