ۇلتتىق ويىندار – وسكەلەڭ ۇرپاقتى ۇيلەسىمدى تاربيەلەۋدىڭ اجىراماس بولىگى. ناۋرىزناما ونكۇندىگى اياسىندا 20 ناۋرىز «ۇلتتىق سپورت» كۇنى دەپ بەلگىلەندى. بۇل كۇنى مەكتەپ وقۋشىلارى ۇلتتىق سپورت تۇرلەرىنەن سايىسقا ءتۇسىپ، ۇلتتىق قۇندىلىقتار دارىپتەلدى، دەپ حابارلايدى اlmaty-akshamy.kz.
جەتىسۋ اۋدانى №110 مەكتەپ-گيمنازياسىندا 7-8 سىنىپ وقۋشىلارى ارقان تارتۋ، اسىق اتۋ، تىماق ۇرۋ، قول كۇرەس، بۇقا تارتىس سياقتى ۇلتتىق سپورت تۇرلەرىنەن سىنعا ءتۇستى. شاراعا 40-قا جۋىق وقۋشى قاتىسىپ، بىلەكتىلەر اراسىنان شىن مىقتىنى انىقتادى. جەڭىمپازدارعا كۋبوكتار مەن ارنايى ديپلومدار تابىس ەتىلدى.
ەلىمىزدە ۇلتتىق سپورت تۇرلەرىنىڭ ىشىندەگى ەڭ تانىمالى – توعىزقۇمالاق. ادامنىڭ ويلاۋ قابىلەتىن دامىتىپ، تاپقىرلىققا تاربيەلەيتىن زياتكەرلىك ويىن تۇرىنەن №7 وقۋشىلار ۇيىندە «ۇلىستىڭ ۇلى كۇنىنە – ۇلتتىق ويىن» وقۋشىلار اراسىندا قالالىق جارىس ءوتتى. سايىسقا قالامىزدىڭ 8 اۋدانىنان 80 وقۋشى قاتىستى. جۇزدەن جۇيرىك شىققان جەڭىمپازدار ارنايى ديپلومدارمەن، مەدالدارمەن ماراپاتتالدى.
بۇگىندە ۇلتتىق سپورت تۇرلەرى تەز تانىمال بولىپ، وقشىلاردىڭ دا قىزىعۋشىلىعىن وياتۋدا. وسى ورايدا اۋەزوۆ اۋدانىنداعى №116 مەكتەپتە دە وقۋشىلار ۇلتتىق سپورت تۇرلەرىنەن ءوزارا سىنعا ءتۇستى. وقۋشىلار ارقان تارتۋ، اسىق اتۋ، تىماق ۇرۋ، بۇقا تارتىس جانە توعىزقۇمالاق سياقتى ۇلتتىق سپورت تۇرلەرىنەن سايىسىپ، ۇلتتىق ويىننىڭ قۇندىلىعىن دارىپتەدى.
سونىمەن قاتار الماتى قالاسىنىڭ بارلىق ءبىلىم بەرۋ ۇيىمدارىندا ۇلتتىق ويىنداردان مەكتەپىشىلىك جارىستار وتكىزىلدى. مۇنداعى ماقسات – قازاق حالقىنىڭ ۇلتتىق ويىندارى ارقىلى وقۋشىلاردىڭ بويىندا ۇلتتىق بىرەگەيلىكتى ساقتاۋ، وقۋشىلاردىڭ پاتريوتتىق سەزىمدەرىن وياتىپ، ءسالت-داستۇرىمىزدى ساقتاي بىلۋگە تاربيەلەۋ.