اتىراۋدا وتكەن ۇلتتىق قۇرىلتايدا پرەزيدەنت توقايەۆ قازىرگى ەلتاڭباعا وراي ايتىلىپ جۇرگەن سىن پىكىرلەر تۋرالى ويىن ورتاعا سالدى. ونىڭ ايتۋىنشا، ەلتاڭبانى كەڭەس زامانىنداعى گەربكە ۇقساتۋشىلار كوپ، «تىم ەكلەكتيكالىق، كۇردەلى» دەۋشىلەر دە از ەمەس.
مۇنداي ويدى ەل بولاشاعىنا بەي-جاي قارامايتىن بەلسەندى ازاماتتار عانا ەمەس، ماماندار دا ايتقان ەكەن. ارتىنشا، ەلتاڭبانى اۋىستىرۋ توڭىرەگىندەگى ماسەلە قوعامدا قىزۋ تالقىعا ءتۇستى. ءبىرازى تاۋەلسىز دەموكراتيانىڭ داڭعىل جولىنا تۇسكەن مەملەكەت رەتىندە كۇيرەگەن كسرو-نى ەسكە تۇسىرەتىن اتريبۋتتاردان ارىلۋ كەرەكتىگىن قولداسا، ەندى ءبىراز جۇرت ەلتاڭبانى اۋىستىرۋعا ۇلكەن دايىندىقپەن كەلگەن ءجون دەپ بىلەدى. تۇبەگەيلى قارسى شىعۋشىلار دا بار.
قۇرىلتايدا ايتىلعان وسى ۇسىنىستان كەيىن بۇگىن ءماجىلىس دەپۋتاتتارى اتالعان ماسەلەگە قاتىستى بىرنەشە دەپۋتاتتىق ساۋال جولدادى. سونىڭ كەيبىرىنە توقتالا كەتەيىن.
بىرىنشىدەن، ەلتاڭبادا تامىرى تەرەڭ تاريحىمىز ارىدان سىر شەرتۋگە ءتيىس. ابزال قۇسپاننىڭ ايتۋىنشا، قولدانىستاعى گەربىمىز ۇلتىمىزعا ءتان قاستەرلى بەلگىلەرمەن بىرلىك پەن بەيبىتشىلىكتى ايشىقتاۋدى ماقسات تۇتقان. دەسە دە، قازاق مەملەكەتى 1991 جىلى عانا پايدا بولعان جوق. مەملەكەت رەتىندەگى تاريحىمىز تەرەڭدە جاتىر. قازاقستان – ارىداعى ساق، عۇن، تۇرىك قاعاناتى، ۇلىق ۇلىس – جوشى ۇلىسىنىڭ، بەرىدەگى قازاق حاندىعىنىڭ تىكەلەي مۇراگەرى. بۇل – ەرلىك پەن ورلىككە تولى تاريح. بۇعان قوسا، بيىل قازاق دالاسىندا تۋ كوتەرگەن جوشى ۇلىسى – التىن وردانىڭ قۇرىلعانىنا 800 جىل تولۋىن اتاپ وتكەلى وتىرمىز. وسى تۇستان الىپ قاراعاندا حالقىمىزدىڭ وتكەنى مەن شەجىرەسى ەلتاڭبادان كورىنىس تاپسا دەگەن ۇسىنىس كوكەيگە قونىمدى. سوندىقتان جاڭا ەلتاڭبا جوباسىن جاسايتىندار كونەدەن تامىر تارتاتىن يدەيالاردى ەنگىزسە، قۇپتاۋعا تۇرارلىق.
ەكىنشى ماسەلە – ەلتاڭباداعى كەڭەس ءداۋىرىن ەسكە تۇسىرەتىن اتريبۋتتاردان ارىلۋ. ءماجىلىس دەپۋتاتى ءابىل ەركىن ءوز ساۋالىندا «قازىرگى ەلتاڭبا – قازاق كسر-نىڭ ەلتاڭباسىنا ۇقسايتىنىن» ايتادى. مىسالى، بيداي ماساقتارىنىڭ ورنىنا تۇلپار قاناتتارى، وراق پەن بالعانىڭ ورنىنا شاڭىراق جانە قازاق كسر-ى دەگەن جازۋدىڭ ورنىنا «Qazaqstan» دەگەن اتاۋ جازىلعان. ال توبەدەگى بەس جۇلدىز وزگەرىسسىز قالدى. وسى رەتتە، دەپۋتات كەزىندە كەڭەس وداعىنىڭ قۇرامىندا بولعان رەسپۋبليكالاردىڭ، سونداي-اق شىعىس ەۋروپا ەلدەرىنىڭ ەلتاڭبا اۋىستىرۋ تاجىريبەسىن جان-جاقتى زەردەلەۋ قاجەت ەكەنىن ايتادى. بۇعان كسرو قۇرامىندا بولعان گرۋزيا، ۋكراينا، بەلارۋس سياقتى ەلدەردىڭ جاڭا ەلتاڭباعا كوشۋىن ۇلگى ەتۋگە بولادى.
ءبىرىمىز ءبىلىپ، ءبىرىمىز بىلە بەرمەسپىز، مەملەكەتتىك ەلتاڭبامىزعا بۇعان دەيىن ءبىر ەمەس، بەس رەت وزگەرىس ەنگىزىلگەن ەكەن. ايتارلىقتاي بولماسا دا، تۇستەر مەن رەڭكتەر، پىشىندەر مەن جازۋلار وزگەردى. جالپى زاماننىڭ اعىمىنا، قوعامنىڭ تالابىنا ساي مەملەكەتتىك رامىزدەردىڭ وزگەرىسكە ۇشىراۋى – قالىپتى جاعداي. بۇعان ماجارستاننىڭ وتكەن عاسىردا ەلتاڭباسىن سەگىز مارتە اۋىستىرعانى ناقتى مىسال بولا الادى.
ارينە، بۇل ماسەلەدە اسىعىستىق تانىتۋدىڭ قاجەتى جوق. «امانات» فراكسياسى مەملەكەتتىك رامىزدەردى جاڭعىرتۋ ماسەلەسىن تالقىلايتىن الاڭ قۇرۋدى ۇسىنىپ وتىر. نەگىزگى ماسەلە – گەربتى زامان سۇرانىسىنا ساي جەتىلدىرۋ. قازىرگى ساياسي وزگەرىستەر مەن رەفورمالاردى نەگىزگە الا وتىرىپ، ەلتاڭبانى اۋىستىرۋ ءبىزدىڭ ەل ءۇشىن جاڭاشا دامۋدىڭ باسى، جاڭاشىلدىقتىڭ بەلگىسى بولۋى كەرەك.