قۇرىلىس سالۋشىلار كومپانيا برەندىن باسپانالاردى جارنامالاۋ ءۇشىن پايدالانۋدا. بۇل تۋرالى ۇكىمەت وتىرىسىندا ق ر باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قۇرىلىس سالۋشىلار تانىمال كومپانيانىڭ برەندىن الىپ، قۇرىلىستى جۇزەگە اسىرماي، نىساندى جارنامالاۋ ءۇشىن پايدالانادى. تۇرعىن ءۇيدى سالۋ جانە ساتۋ پروسەسىن قۇرىلىس سالۋشىنىڭ ۋاكىلەتتى كومپانيالارى بولىپ تابىلمايتىن ءۇشىنشى تۇلعالار جۇزەگە اسىرادى. بۇل نىساننىڭ قۇرىلىسى ءۇشىن جاۋاپكەرشىلىكتەن، سونداي-اق مونوپولياعا قارسى جانە سالىقتىق باقىلاۋدان كەتۋگە جول اشادى»، - دەدى اگەنتتىك ءتوراعاسى.
ونىڭ اتاپ وتۋىنشە، قۇرىلىس سالۋشىلارمەن زاڭدى بايلانىسى جوق ۇيىمدار ساتقان پاتەرلەردى ساتىپ الۋشىلار قۇقىقتىق كەپىلدىكسىز قالۋدا. بۇل تۇرعىن ءۇي ساپاسىنا جانە نىسانداردى تاپسىرۋ مەرزىمىنە قاتىستى جاپپاي شاعىمداردىڭ كوبەيۋىنە سەبەپ بولىپ وتىر.
«كەلىسىمشارتتىڭ نەگىزسىز شارتتارىن مىندەتتەۋ تاجىريبەسى كەڭىنەن تارالۋدا. بۇل - قۇرىلىس سالۋشىلارمەن، ۇلەستەس باسقارۋشى كومپانيالارمەن، بايلانىس، ينتەرنەت قىزمەتتەرى، كابەلدىك تەلەديدار وپەراتورلارىمەن كەلىسىمشارت جاساسۋ، پاركينگ ساتىپ الۋ بويىنشا تالاپتار. وسىلايشا، مونوپوليالىق قۇرىلىس نارىعى كورشىلەس نارىقتارداعى باسەكەلەستىكتى شەكتەيدى»، - دەپ اتاپ ءوتتى سەرىك جۇمانعارين.