الماتىلىقتار جەكە سەكتور جانىنان كوپ قاباتتى ءۇي سالۋعا قارسى
«قالقامان» ىقشاماۋدانىنداعى جەكە ۇيلەردە تۇراتىن الماتىلىقتار كوپ قاباتتى تۇرعىن ءۇي كەشەنىنىڭ سالىنۋىنا قارسىلىق ءبىلدىردى، دەپ حابارلايدى almaty-akshamy.kz قازاقپاراتقا سىلتەمە جاساپ.
تۇرعىندار جەكە ۇيلەر مەن كوتتەدجدەردىڭ اراسىنا كوپ قاباتتى تۇرعىن ءۇي كەشەنىن تۇرعىزۋعا قارسى. ولاردىڭ پىكىرىنشە، كوپ قاباتتى قۇرىلىس اۋداننىڭ ساۋلەتتىك كەلبەتىن بۇزادى، جەل كوتەرىلەدى، اۋانى لاستايدى. ودان بولەك، جالعا بەرىلەتىن پاتەرلەر قىلمىستىق جاعدايعا اكەلەدى.
سونىمەن قاتار بەلسەندىلەردىڭ پايىمىنشا، تۇرعىن ءۇي كەشەنى اۆتوتۇراق تاپشىلىعىن تۋدىرادى.
تۇرعىندار كوپ قاباتتى ءۇي ورنىنا سپورت جانە ويىن الاڭدارى بار ساياباق سالۋدى ۇسىندى.
ناۋرىزباي اۋدانىنىڭ اكىمدىگى تالجانوۆ كوشەسى، 1ا مەكەنجايىنداعى ۋچاسكە زاڭدى تۇلعاعا تيەسىلى ەكەنىن ءمالىم ەتتى.
قازىرگى ۋاقىتتا تۇرعىن ءۇي كەشەنىن سالۋ جوباسى بەكىتىلگەن جوق.
«قازاقستان رەسپۋبليكاسىنداعى ساۋلەت، قالا قۇرىلىسى جانە قۇرىلىس قىزمەتi تۋرالى» زاڭىنىڭ 13-بابىنا جانە «قالانىڭ ساۋلەتتىك كەلبەتىن قالىپتاستىرۋ مەن قالا قۇرىلىسىن جوسپارلاۋ ەرەجەلەرى» قاعيداتىنا سايكەس، قۇرىلىس سالۋشى جوبانى قوعامدىق تالقىلاۋدان وتكىزۋگە مىندەتتى»، - دەپ اتاپ ءوتتى اكىمدىكتە.