قازاقستاندا «باتىل تويتارىس – 2022» ۆەدومستۆوارالىق وقۋ-جاتتىعۋ باستالدى
ەلىمىزدىڭ 9 وڭىرىندە قارۋلى كۇشتەر قۇرىلىمدارى مەن وزگە ۆەدومستۆولاردىڭ «باتىل تويتارىس – 2022» بىرلەسكەن وقۋ-جاتتىعۋى ءوتىپ جاتىر. بۇل تۋرالى ق ر قورعانىس مينيسترلىگىنەن ءمالىم ەتتى، دەپ حابارلايدى اlmaty-akshamy.kz.
وقۋ-جاتتىعۋ مەملەكەت باسشىسى قاسىم-جومارت توقايەۆتىڭ كۇشتىك قۇرىلىمدار اراسىنداعى ءتيىمدى ۇيلەستىرۋدى قامتاماسىز ەتۋ، ولاردىڭ جەدەل جانە اسكەري-تەحنيكالىق ۇيلەسىمدىلىگىن جولعا قويۋ، سونداي-اق ۆەدومستۆوارالىق ۇيلەستىرۋدى كۇشەيتۋ جونىندەگى تاپسىرمالارىن ورىنداۋ اياسىندا ۇيىمداستىرىلدى.
«باتىس تويتارىس – 2022» كەشەندى ستراتەگيالىق كوماندالىق-شتابتىق وقۋ-جاتتىعۋى اقتوبە، الماتى، اتىراۋ، جامبىل، قىزىلوردا، ماڭعىستاۋ، تۇركىستان وبلىستارىنىڭ، سونداي-اق الماتى جانە شىمكەنت قالالارىنىڭ اۋماعىندا وتەدى.
شاراعا قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ قۇرامالارى مەن بولىمدەرى، ورتالىق مەملەكەتتىك جانە جەرگىلىكتى اتقارۋشى ورگاندار جۇمىلدىرىلعان.
«وقۋ-جاتتىعۋدىڭ العاشقى كەزەڭىندە مەملەكەتتىك شەكارانى قورعاۋدى كۇشەيتۋ، قوعامدىق قاۋىپسىزدىكتى قامتاماسىز ەتۋ، اسكەري قاۋىپ-قاتەرلەردىڭ ءورشۋى جاعدايىندا تەرروريزمگە قارسى وپەراسيالاردى جۇرگىزۋ كەزىندەگى ءوزارا ءىس-قيمىل ماسەلەلەرى پىسىقتالادى.
«باتىل تويتارىس – 2022» وقۋ-جاتتىعۋ اعىمداعى جىلعى 16 ساۋىرگە دەيىن جالعاسادى»، - دەلىنگەن قورعانىس مينيسترلىگىنىڭ حابارلاماسىندا.