ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ سالتاناتتى ەسەپتوبىنا ەڭ لايىقتى دەگەن كۋرسانتتار ىرىكتەلدى، دەپ حابارلايدى aqshamnews.kz.
ۇلى وتان سوعىسىنداعى جەڭىستىڭ 80 جىلدىعى مەن وتان قورعاۋشىلار كۇنىنە ارنالعان اسكەري شەرۋگە قاتىسۋ ءۇشىن اسكەري ينستيتۋتتىڭ 127 كۋرسانتى مەن ەكى وفيسەرى استاناعا كەلدى. وقۋ ورنىنىڭ ساپتىق پلاسىندا ءۇش اي بويى كۇن سايىن قارقىندى جاتتىعۋلار وتكىزىلدى. ەندى ساپتىق تاسىلدەردى ودان ءارى شىڭداۋ ەلوردانىڭ جاتتىعۋ الاڭدارىندا جالعاسادى.
ءاربىر كۋرسانت اسكەري شەرۋگە قاتىسۋدى بولاشاق وفيسەردىڭ ومىرىندەگى ماڭىزدى كەزەڭ ەكەنىن جاقسى تۇسىنەدى. بۇل جاي عانا جاتتىعۋ نەمەسە كاسىبي دايىندىقتىڭ كورىنىسى ەمەس. ەلىمىزدىڭ باس الاڭىندا اسكەرلەردىڭ سالتاناتتى ساپ تۇزەۋى ۇلى وتانى سوعىسى مايداندارىندا ەرلىكتىڭ ەرەن ۇلگىسىن كورسەتكەن اتا-بابالارىمىزعا قۇرمەت بولماق.
ماسەلەن، كۋرسانتتار رۋسلان دارحانوۆ پەن الماس ايتقاننىڭ اتالارى دارحان مىڭبايەۆ پەن ورازاي مۇساقوۆ مايدانگەرلەر. ءبىرى ۋكراينا، ەندى ءبىرى كالينين مايدانىندا سوعىسقان. ەكەۋى دە بۇگىنگى تاريحي وقيعاعا قاتىسۋ مۇمكىندىگىن يەلەنگەنىن ەرەكشە ماقتان ەتەدى.
قۇرلىق اسكەرلەرى اسكەري ينستيتۋتى 3-باتالونىنىڭ كومانديرى پودپولكوۆنيك جاسۇلان سەيىتقازين ەكىنشى، ءۇشىنشى كۋرس كۋرسانتتارى جەڭىس شەرۋىنە قاتىسۋشىلار رەتىندە وقۋ ورنىنىڭ تاريحىنا ەنەدى دەپ ەسەپتەيدى. ول قاراماعىنداعىلار ءوز مىندەتتەرىن ءساتتى ورىندايتىنىنا سەنىمدى، ويتكەنى جەڭىس شەرۋىنە قاتىسۋ – كوپتىڭ ارمانى.