ريشاد گالييەۆ — الماتى قۇرىلىس-تەحنيكالىق كوللەدجىنىڭ تۇلەگى، ونىڭ ەڭبەك جولى جۇمىسشى ماماندىقتارى تۋرالى ستەرەوتيپتەردى بۇزىپ قانا قويماي، ماڭداي تەرمەن ادال ەڭبەك تابۋعا ىنتالاندىرادى. بۇگىندە ول ەلدەگى ەڭ جوعارى جالاقى الاتىن جاس مامانداردىڭ بىرىنە اينالدى. ريشاد ايىنا 800 مىڭ تەڭگە تابىس تابادى. ونىڭ ەڭبەك جولى — ماقساتقا جەتۋدەگى جىگەرلى تاباندىلىقتىڭ جانە ءوز ىسىنە سەنۋدىڭ جارقىن مىسالى بولا الادى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
ريشاد — WorldSkills Kazakhstan رەسپۋبليكالىق كاسىبي شەبەرلىك چەمپيوناتىنىڭ بىرنەشە دۇركىن جۇلدەگەرى. 2022 جىلى ول الەمدىك چەمپيوناتقا ەلىمىزدىڭ اتىنان «سانتەحنيكا جانە جىلىتۋ» قۇزىرەتتىلىگى بويىنشا قاتىستى. كوللەدجدىڭ ەكىنشى كۋرسىندا ريشاد كوللەدجدىڭ جەتەكشى كومپانيالارمەن سەرىكتەستىگى جانە دۋالدى وقىتۋ جۇيەسى اياسىندا قۇرىلىس الاڭدارىندا تاعىلىمدامادان وتە باستادى. وسى تاجىريبە پراكتيكالىق داعدىلار مەن ماماندىقتى ءىس جۇزىندە يگەرۋگە مۇمكىندىك بەردى. جاقىن ارادا ول GROHE حالىقارالىق كومپانياسىنان جۇمىسقا ورنالاسۋعا ۇسىنىس الدى.
ول ماماندىقتى اۋەل باستا اتا-اناسىنىڭ كەڭەسى بويىنشا تاڭدادى، كەيىن بۇل ماماندىق ونىڭ جۇرەك قالاۋىنا اينالعان.
«مەن ءوزىم وقىعان كوللەدجگە جانە ۇستازدارىما العىس ايتامىن — ولار ماعان تەك ءبىلىم عانا بەرىپ قويماي، مامان رەتىندە وزىمە دەگەن سەنىمدىلىكتى ارتتىردى. كوللەدجدىڭ كومپانيامەن ىنتىماقتاستىعىنىڭ ارقاسىندا مەن ەڭبەك تاجىريبەمدى ەرتە باستاۋعا مۇمكىندىك الدىم جانە بۇل مەنىڭ ءوسۋ نۇكتەمە اينالدى. مەن جۇمىسشى ماماندىقتارىنىڭ جىلى ءۇشىن ەل پرەزيدەنتىنە ەرەكشە ريزامىن. بۇل ماڭىزدى قادام، ول بىزگە جۇمىسشى ماماندىعىنىڭ يەسى بولۋ — قۇرمەتتى، زاماناۋي جانە سۇرانىسقا يە ەكەندىگىن دالەلدەيدى. جۇمىسشى ماماندىقتارى — بۇل ءبىزدىڭ ءوز قولىمىزبەن قالاپ جاتقان بولاشاعىمىزدىڭ ىرگەتاسى»، — دەيدى كوللەدج تۇلەگى.
قازىرگى تاڭدا الماتى قۇرىلىس-تەحنيكالىق كوللەدجىندە 1200-دەن استام ستۋدەنت وقيدى. ولاردىڭ 90%-عا جۋىعى العان ماماندىقتارى بويىنشا جۇمىسقا ورنالاسادى. دۋالدى وقىتۋ جانە جەتەكشى كاسىپورىندارمەن بەلسەندى ىنتىماقتاستىقتىڭ ارقاسىندا ستۋدەنتتەر 2-3-كۋرستاردا اقىلى تاجىريبەدەن وتۋگە مۇمكىندىك الادى. بۇل كەزەڭدە وقۋشىلاردىڭ ورتاشا تابىسى ايىنا 300 مىڭنان 500 مىڭ تەڭگە ارالىعىن قۇرايدى.