ءتۇسىنىپ، عيبرات العان ادامعا باسقا قۇلشىلىقتار سەكىلدى قۇرباندىقتىڭ دا ادام مىنەزىن تاربيەلەۋدە ايرىقشا ورنى بار. اسىرەسە ەگويزم بارىنشا ناسيقاتتالعان مىنا زاماندا قۇرباندىق ءبىزدى كوپشىلدىككە، وزگە ءۇشىن قىمباتىمىزدى قيۋعا تاربيەلەيدى. جالپى العاندى ىزگىلىك اتاۋلى قۇرباندىق قۇندىلىعىنا نەگىزدەلگەن. وزىڭنەن جىرىپ بەرگەن قۇرباندىعىڭ قانشالىق قىمبات ءھام ءماندى بولسا، تاقۋالىعىڭ دا سونشالىق تەرەڭ.
مىسالى، كەيدە ادام كوڭىلى ءۇشىن التىن ۋاقىتىڭدى ءبولىپ، بىرگە ۋاقىت وتكىزۋدىڭ ءوزى - قۇرباندىققا جاتادى.
وزىڭە قانشا جەردەن ءتيىمسىز ءارى قيىن بولسا دا بەرگەن ۋادەڭدە تۇرۋ دا - قۇرباندىققا سانالادى.
ايتىپ تاستايتىن تۇستا كىسى جۇرەگىن جارالاماۋ ءۇشىن ءتىلىڭدى تىستەپ، ءۇنسىز قالۋ دا - قۇرباندىق.
ەل يگىلىگى ءۇشىن ءوز مۇددەڭنەن باس تارتىپ، كەرى شەگىنۋ، ءتىپتى، كەيدە اقيقات ءۇشىن جەكسۇرىن بولۋ دا - قۇرباندىق.
ەسەپ ايىرىسىپ، ءوش الۋعا شاماڭ جەتە تۇرا كىنالىنى كەشىرە ءبىلۋ دە - قۇرباندىق.
كەيدە بالالارىڭنىڭ باقىتى ءۇشىن قيىن ادامعا سابىر ەتىپ، ءومىر بويى بىرگە عۇمىر كەشۋىڭ دە قۇرباندىق.
ال الاش ارىستارىنداي جان راحاتىڭدى قيىپ، ەل ءۇشىن بار ءومىرىڭدى پيدا ەتۋ بولسا - ەڭ ۇلى قۇرباندىق.
قۇرباندىقتىڭ نەشە اتاسىن جاساساڭ دا، سونىڭ ءبارىن ۇمىتىپ، پەندەدەن زارەدەي العىس پەن قارىم كۇتپەۋ - جاراتقاننىڭ ريزاشىلىعىنا ۇمتىلعان شىن تاقۋا ادامنىڭ قاسيەتى.
اسىلىندە مىنا دۇنيەدەگى ءوزىمىز ءۇشىن جاساعان بارلىق ىس-ارەكەتىمىز وسى پانيەدە قالادى. ال پيدا ەتكەن ءاربىر قۇرباندىعىمىز عانا ماڭگىلىككە اينالادى.
اللا ەلشىسى (س.ا.ۋ.) ءبىر كۇنى ايشا انامىزدان “شالعان قۇرباندىقتان وزىمىزگە نە قالدى؟”-دەپ سۇراعاندا “ءبارىن تاراتىپ بەردىك. وزىمىزگە تەك جاۋىرىنى عانا قالدى” دەپ جاۋاپ بەردى. سوندا اللا ەلشىسى: “كەرىسىنشە جاۋىرىننان باسقاسىنىڭ ءبارى بىزگە قالدى.”- دەيدى.
قۇراندا: “قۇرباندىققا شالعان مالىڭنىڭ ەتى دە، قانى دا استە اللاعا جەتپەيدى. وعان جەتەتىن تەك تاقۋالىق ىستەرىڭ عانا.” -(“حاج” سۇرەسى، 37-ايات.) دەلىنگەن.
قۇربان ايت مۇباراك، دۇعا-تىلەك، شالعان قۇرباندىقتارىڭىز قابىل بولعاي!
ايت كۇنى اينالامىزعا شاتتىق سىيلاپ، اتا-انا، اعايىن-تۋىستىڭ ريزاشىلىعىن الۋعا اسىعايىق!
Kairat Zholdybaiulyنىڭ الەۋمەتتىك پاراقشاسىنان