قۇربان ايت قارساڭىندا ەلىمىزدە مال ساۋداسى قىزىپ، نارىقتا باعالار وگەرەدى. وسى ورايدا Maltabu.kz پلاتفورماسىنا تالداۋ جاساپ، ايت مەرەكەسىنە دەيىن جانە كەيىن باعانىڭ قالاي قۇبىلعانىن سارالاپ كوردىك. 

ايت قارساڭىندا ناۋرىزباي قاجى تاعان ۇلى مال قۇنىن قولدان كوتەرمەي، حالىققا قولجەتىمدى باعاعا ساتۋعا شاقىرعان ەدى. 

"قۇربان ايتتا حالىققا جاقسىلىق جاساپ، كوپشىلىكتىڭ العىسىن الايىق. بۇل – ساۋاپتى ءارى ساعىنىشپەن كەلەتىن مەيرام"، دەدى ناۋرىزباي قاجى تاعان ۇلى.

الايدا ايت الدىنداعى اپتا سۇرانىس قانداي بولدى؟

Maltabu.kz پلاتفورماسىندا جاريالانعان ساتىلىمدار بويىنشا، قۇربان ايتقا دەيىنگى ون كۇن ىشىندە قوي، ەشكى مەن سيىر باعالارى ورتا ەسەپپەن 15-20 پايىزعا دەيىن وسكەنى بايقالدى.

• قوي: مامىردىڭ ورتاسىندا ورتاشا باعاسى 55 000 تەڭگە بولسا، ايت قارساڭىندا 65 000 تەڭگەگە دەيىن جەتكەن؛

• سيىر: ماۋسىم باسىندا شامامەن 350 000 تەڭگە بولسا، مەرەكە الدىندا 400 000 تەڭگەگە دەيىن وسكەن.

كەيبىر وڭىرلەردە اسىل تۇقىمدى مالدار مەن ءىرى قوشقارلاردىڭ باعاسى 1،5 ەسەگە دەيىن قىمباتتاعان.

ال 5 ماۋسىمدا مال باعاسى ءوسىپ كەتكەن. 

بۇل تۋرالى نۇرلان يمام نە دەيدى؟ 

"بىرىنشىدەن، نارىق ەشكىمگە، ەشتەڭەگە تاۋەلدى ەمەس، ول ناقتى ءبىر قۇرىلعان دامۋ ديناميكاسىمەن جۇرەدى. تەڭگە تيىننان قۇرالعانداي، باعانىڭ تومەندەۋى نەمەسە شارىقتاۋى كۇن سايىن كوز الدىمىزدا ءجۇرىپ جاتىر، تەك ونى ءوزىمىز بايقامايمىز. ەكىنشىدەن، ءدىني مەرەكەلەر كەزەڭىندە نارىقتى قاداعالاۋ يمام-مولدالاردىڭ مىندەتى ەمەس، ونى قاداعالايتىن ارنايى انتي مونوپوليالىق قىزمەتتەر بار. ۇشىنشىدەن، قۇرباندىق قۇدايعا جاقىنداۋ، ياعني قاي امالىمىز وتەدى، ماسەلە سوندا. بويىمىزدا ەڭ جامان قىرىق قاسيەتتىڭ بىرنەشەۋى بولسا، مىسالى، تاكاپپارلىق، ماقتانشاقتىق، وتىرىك ايتۋ، جالعان سويلەۋ جانە تاعى باسقا، وعان قويدىڭ نە كىناسى بار؟ مىنە، ناعىز قۇرباندىق وسى قۇربان ايتتا، ياعني وسى جامانداردى قۇربان ەتۋ –  اللاعا جاعاتىن ءىس. ودان كەيىن ءبىز نەگە ساۋاپتى تەك اس بەرۋ، مال شالۋدان ىزدەيمىز. ءجانناتتىڭ ەسىگىن جاقسى مىنەز اشاتىن بولسا، جاقسى نيەت، جاقسى پەيىل، جاقسى قارىم-قاتىناس جاقسى مىنەزدى قالىپتاستىرادى، ياعني ساۋاپ ناق وزىمىزدە، ىشكى دۇنيەمىزدە، تەك جارىققا شىعار دۇنيە پەيىل"، - دەيدى ول. 

قۇربان ايت كەزىندە قۇرباندىق شالاتىن ورىندار:

الماتىنىڭ جەتى اۋدانىندا وسىعان وراي ۇلكەن مەشىتتەرگە جاقىن جەردە قۇربان شالاتىن 12 ارناۋلى ورىن اشىلدى. قالانىڭ باس يمامى تولەبي وسپان مەن ءدىن ىستەرى باسقارماسىنىڭ ءبولىم باسشىسى دوسحان راحمەتىلدايەۆ  الماتى قالاسىنىڭ وڭىرلىك كوممۋنيكاسيالار قىزمەتىندە وسىلاي دەپ حابارلادى.  
 
6 ماۋسىمدا تاڭعى ساعات 06:00-دە قالانىڭ 56 مەشىتىندە ايت نامازى وقىلادى. نامازدان كەيىن بىردەن قۇرباندىق شالۋ ءراسىمى باستالادى.

الماتىداعى قۇربان شالۋ رۇقسات ەتىلگەن ورىنداردىڭ ءتىزىمى:
 
الاتاۋ اۋدانى بويىنشا:
1. "مىرزاحمەت" مەشىتى. قاراسۋ ش/ا، سولتۇستىك اينالما جولى كوشەسى، 15.
2. "اسكەر اتا" مەشىتى. ايگەرىم-1 ش/ا، بەنبەرين كوشەسى، 18/4.
3. "العاباس" مەشىتى. العاباس ش/ا، سايگۇبە كوشەسى، 6.
 
بوستاندىق اۋدانى بويىنشا:
1. "باقىتكەلدى" مەشىتى. ءحان-تاڭىرى ش/ا، دۋلاتي كوشەسى، 27/11.
 
مەدەۋ اۋدانى بويىنشا:
1. "ومار يبن ءال-حاتتاب" مەشىتى. جۋكوۆ كوشەسى، 136 ا.
2. "امانقۇل اتا" مەشىتى. ت. بيگەلدينوۆ كوشەسى، 5.
3. "فاتيما" مەشىتى. ش. جانىبەك كوشەسى، 148.
4. "رايىمبەك باتىر" مەشىتى. دۋمان-1 ش/ا، حان ءتاڭىرى كوشەسى، 15.
5. "ارافات" مەشىتى. يبراگيموۆ كوشەسى، 5 ا.
 
ناۋرىزباي اۋدانى بويىنشا:
1. "قالقامان-2" مەشىتى. قالقامان-2 ش/ا، اسپاندياروۆ كوشەسى، 84.
 
تۇركسىب اۋدانى بويىنشا:
1. "قايرات" مەشىتى. قايرات ش/ا، سارىمولدايەۆ كوشەسى، 22.
 
جەتىسۋ اۋدانى بويىنشا:
1. "ءال-مادينا" مەشىتى. فەدوروۆ كوشەسى، 12.

ونلاين قۇربان شالۋ جايلى نەنى ءبىلۋىمىز كەرەك؟ 

ونلاين قۇربان شالۋ ءۇشىن ازاماتتارعا ارنايى qurban.muftyat.kz سايتى اشىلعان. سايتتان قاراجاتىڭىزعا قاراي ۇساق نەمەسە ءىرى قارا مال تاڭداپ، بانك ارقىلى تولەم جاساساڭىز جەتكىلىكتى. قوي مەن ەشكى — جەكە ادامعا، ال سيىر مەن تۇيەنى — ءبىر ادام نەمەسە جەتى ادامنىڭ بىرىگۋىمەن شالۋعا رۇقسات.

تاپسىرىس ءساتتى راسىمدەلگەن سوڭ تاپسىرىس بەرۋشىگە SMS حابارلاما جىبەرىلەدى. قۇربان شالىنعان سوڭ فوتو جانە بەينەەسەپ ۇيالى تەلەفون نومىرىنە جولدانادى. قۇرباندىق ەتى تۇگەلدەي مۇقتاج جاندارعا جەتكىزىلەدى.