قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى مۇسىلمان قاۋىمىن قۇربان ايت مەرەكەسىمەن قۇتتىقتادى، - دەپ حابارلايدى aqshamnews.kz.
"اسا قامقور ەرەكشە مەيىرىمدى اللانىڭ اتىمەن باستايمىن! بارلىق ماقتاۋ اللاعا ءتان. ارداقتى پايعامبارىمىز مۇحاممەدكە اللانىڭ سالاۋاتى مەن سالەمى بولسىن! بارشاڭىزدى ءيسى مۇسىلمان بالاسىنىڭ ۇلىق مەيرامى – قۇربان ايتپەن شىن جۇرەكتەن قۇتتىقتايمىن! سىزدەرگە اللادان اماندىق، مىقتى دەنساۋلىق، مول ىرىس پەن باق-بەرەكە تىلەيمىن! شىن مانىندە، قۇربان ايت – جالاڭ قۇرباندىق ەمەس، ول – ىشكى جان-دۇنيەڭدى تازارتۋ مەن رۋحاني تۇرعىدان جاڭعىرۋ دەگەن ءسوز. راسىندا "قۇربان" ءسوزى "جاقىن بولۋ"، "جاقىنداۋ" دەگەن ۇعىمدى بىلدىرەدى. بۇل – شىنايى نيەت پەن اللاعا دەگەن سۇيىسپەنشىلىكتى پاش ەتەتىن مەيرام. ۇلىق مەرەكەنىڭ تاربيەلىك ءمانى مەن ماعىناسى وسىندا جاتىر.
قاسيەتتى قۇراندا "حاج" سۇرەسىنىڭ 37-اياتىندا: "ۇمىتپاڭدار، ولاردىڭ ەتى دە، قانى دا ەشقاشان اللاعا جەتپەيدى. وعان جەتەتىن نارسە – جۇرەكتەرىڭىزگە ۇيالاعان تاقۋالىقتارىڭ (شىنايى نيەتتەرىڭ)" دەلىنگەن. ال ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): "ادام بالاسى قۇربان ايت كۇنى قۇربان شالۋدان وزگە امالىمەن اللاعا جاقىنداعان ەمەس..." دەپ، بۇل كۇندەرى اللاعا ۇنامدى ءارى ەڭ سۇيىكتى امال – قۇربان شالۋ ەكەنىن جەتكىزگەن. ماتەريالدىق مۇمكىندىگى بار، ءارى جولاۋشى ەمەس مۇسىلمانعا قۇرباندىق شالۋ – ءۋاجىپ (مىندەت). ال شاماسى كەلمەگەن ادامعا اللا تاعالا مۇنداي مىندەت جۇكتەمەيدى. ايت كۇندەرى از دا بولسا ساداقا بەرىپ، قاراۋسىز قالعان قارتتارعا، جەتىمدەر مەن كوپبالالى وتباسىلارعا كوڭىل ءبولۋ – ساۋاپتى ءىس"، - دەدى باس ءمۇفتي ءوز قۇتتىقتاۋىندا.
ناۋرىزباي قاجى تاعان ۇلى قۇربان ايت قۇربان شالۋمەن شەكتەلمەيتىنىن ايتىپ، ساۋاپتى يگى ىستەردى اتادى.
"بۇل – اعايىن اراسىن جاقىنداتا تۇسەتىن كۇن. ارازداسقان ادامدار تاتۋلاسىپ، ءوزارا كەشىرىم جولىن ۇستانادى. ايت كۇندەرى تۋىسقاننىڭ باسىن قوسىپ، قارىم-قاتىناستى كۇشەيتكەن ابزال. قۇربان ايت – وتباسى قۇندىلىعىن ارتتىراتىن مەرەكە. اتا-انامىزعا، بالا-شاعامىزعا سىيلىق بەرىپ، ولارعا ارنايى كوڭىل ءبولىپ، بارىنشا قۋانتايىق. مۇندايدا وسكەلەڭ ۇرپاق قۇربان ايتتىڭ ءقادىرى مەن ساۋابىن سەزىنىپ، ىزگىلىككە ۇمتىلادى، مەرەكەنى اسىعا كۇتەدى. قوجا احمەت ياساۋي بابامىز ءبىر دانالىق سوزىندە حاققا قىزمەت حالىققا قىزمەت ەتۋدەن باستالاتىنىن ايتقان. بۇل – حالىقتىڭ رازىلىعى – حاقتىڭ رازىلىعىندا دەگەن ءسوز. وسى رەتتە ەلىمىزدەگى بارشا شارۋا قوجالىقتارىنىڭ قوجايىندارىن مال قۇنىن قولدان كوتەرمەي، حالىققا وڭتايلى باعانى ۇسىنۋعا شاقىرامىن.
سونىمەن قاتار، بارشا كاسىپكەرلەردى تۇرعىندار كۇندە تۇتىناتىن الەۋمەتتىك ماڭىزى بار ازىق-تۇلىك باعاسىنا مۇمكىندىگىنشە جەڭىلدىك جاساۋعا ۇندەيمىن. اللانىڭ راقىم نۇرى توگىلەتىن قۇربان ايتتا جۇرتىمىزعا جاقسىلىق جاساپ، كوپشىلىكتىڭ العىسىن الايىق، اعايىن! اللا تاعالا شالعان قۇرباندىعىمىزدى، بەرگەن ساداقامىزدى قابىل ەتىپ، ەكى دۇنيە نىعمەتىنە بولەگەي! ءاۋمين!"، - دەدى ناۋرىزباي قاجى تاعان ۇلى.