قۇمار ويىنعا تاۋەلدىلىكپەن كۇرەس كۇشەيتىلدى: لۋدومانيانىڭ الدىن الۋ قالاي ءجۇرىپ جاتىر؟

قازاقستاندا قۇمار ويىنعا تاۋەلدىلىك - لۋدومانيانىڭ الدىن الۋ باعىتىنداعى جۇمىس كۇشەيتىلدى، - دەپ حابارلايدى Aqshamnews.kz.

تۋريزم جانە سپورت مينيسترلىگى بۇل ماسەلەنى ازايتۋ ءۇشىن 2024-2026 جىلدارعا ارنالعان زاڭسىز ويىن بيزنەسى مەن لۋدومانياعا قارسى كەشەندى جوسپاردى جۇزەگە اسىرىپ جاتىر. قۇجات قازاقستان ۇكىمەتىنىڭ قاۋلىسىمەن بەكىتىلگەن.

لۋدومانيانىڭ اۋقىمى زەرتتەلدى

جوسپار اياسىندا مينيسترلىك رەسپۋبليكا كولەمىندە الەۋمەتتىك زەرتتەۋ جۇرگىزدى. 6 مىڭ ادام قاتىسقان ساۋالناما قۇمار ويىندارعا تاۋەلدىلىكتىڭ سەبەپتەرى مەن تارالۋ دەڭگەيىن انىقتاۋعا مۇمكىندىك بەرگەن.

سونىمەن قاتار:

• مەكتەپ وقۋشىلارى مەن ستۋدەنتتەرگە ارنالعان الدىن الۋ ادىستەمەلەرى ازىرلەندى؛

• تاۋەلدىلىكتى ەرتە انىقتاۋعا باعىتتالعان ۇسىنىمدار دايىندالدى؛

• ءبىلىم بەرۋ ۇيىمدارى مەن اسكەري بولىمدەردە 800-دەن استام پەداگوگ پەن پسيحولوگ ارنايى وقىتۋدان ءوتتى؛

• پروفيلاكتيكالىق ساباقتارعا ارنالعان بەينەماتەريالدار ازىرلەندى.

مەكتەپتەن مەشىتكە دەيىنگى ءتۇسىندىرۋ جۇمىستارى

كەشەندى جوسپارعا سايكەس، ءبىرقاتار ورتالىق مەملەكەتتىك ورگاندار دا پروفيلاكتيكالىق شارالارعا بەلسەندى اتسالىستى:

• 6 مىڭنان استام مەكتەپتىڭ تاربيە جوسپارىنا لۋدومانيا مەن ينتەرنەتكە تاۋەلدىلىكتىڭ الدىن الۋ تاقىرىپتارى ەنگىزىلدى؛

• اتا-انالاردى قولداۋ ورتالىقتارىنىڭ باعدارلامالارى جاڭارتىلدى؛

• ءدىني قىزمەتكەرلەردىڭ قاتىسۋىمەن ءتۇسىندىرۋ جۇمىستارى جۇرگىزىلىپ، 1 ميلليوننان استام ادام قامتىلدى؛

• جوعارى وقۋ ورىندارىندا 400-دەن اسا سالاۋاتتى ءومىر سالتىن ناسيحاتتايتىن ءىس-شارا ءوتتى؛

• اسكەري بولىمدەردە دوڭگەلەك ۇستەلدەر، كونفەرەنسيالار مەن ساۋالنامالار ۇيىمداستىرىلدى.

لۋدومان ادامدارعا قانداي كومەك كورسەتىلەدى؟

قۇمار ويىنعا پاتولوگيالىق بەيىمدىلىگى بار ازاماتتارعا:

• مەديسينالىق-الەۋمەتتىك كومەك،

• مامانداندىرىلعان وڭالتۋ ورتالىقتارى ارقىلى قولداۋ،

• پسيحولوگيالىق كەڭەس بەرۋ قىزمەتتەرى ۇسىنىلادى.

سونىمەن قاتار رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعى بازاسىندا لۋدومان ادامدار مەن ولاردىڭ جاقىندارىنا ارنالعان كولل-ورتالىق جۇمىس ىستەيدى.

2024 جىلدىڭ ساۋىرىنەن باستاپ مەملەكەتتىك قىزمەتشىلەرگە ارنالعان ارنايى سەمينارلار دا تۇراقتى تۇردە وتكىزىلىپ كەلەدى.

مامانداردىڭ ايتۋىنشا، قۇمار ويىنعا پاتولوگيالىق بەيىمدىلىك حالىقارالىق دەڭگەيدە رەسمي تانىلعان. ول حالىقارالىق اۋرۋلار جىكتەمەسىندە F63.0 كودى بويىنشا تىركەلگەن.

دەنساۋلىق ساقتاۋ مينيسترلىگىنىڭ مالىمەتىنە سۇيەنسەك:

• 2024 جىلى مەملەكەتتىك مەديسينالىق ۇيىمدارعا 69 ادام وسى دياگنوزبەن جۇگىنگەن؛

• 2025 جىلدىڭ ءبىرىنشى جارتىجىلدىعىندا 35 ادام مەديسينالىق كومەك العان.

بۇل دەرەكتەر لۋدومانيانىڭ الدىن الۋ بويىنشا جۇيەلى جۇمىستى جالعاستىرۋدىڭ ماڭىزىن كورسەتەدى.

تۋريزم جانە سپورت مينيسترلىگى قۇزىرەتى اياسىندا قوعامدىق دەنساۋلىقتى قورعاۋ جانە قۇمار ويىندارعا جاۋاپتى كوزقاراستى قالىپتاستىرۋ باعىتىنداعى پروفيلاكتيكالىق شارالاردى جالعاستىراتىنىن مالىمدەدى.