ءال-فارابي اتىنداعى قازاق ۇلتتىق ۋنيۆەرسيتەتىندەگى ءبىرقاتار وقۋ كورپۋستارىنىڭ شاتىرىنا كۇن پانەلدەرى ورناتىلدى، - دەپ حابارلايدى Aqshamnews.kz.
اتاپ ايتقاندا، ەكونوميكا جانە بيزنەس جوعارى مەكتەبى، جۋرناليستيكا، زاڭ، تاريح، گەوگرافيا، بيولوگيا، فيلولوگيا جانە مەديسينا فاكۋلتەتتەرىنىڭ عيماراتتارى كۇن پانەلدەرىمەن جابدىقتالدى.
اتالعان جوبا ەنەرگيانى ۇنەمدەۋگە جانە ەلەكتر قۋاتىنا كەتەتىن شىعىندى ايتارلىقتاي ازايتۋعا سەپتىگىن تيگىزەدى.
ەنەرگيا ءوندىرۋ ستانسياسى كەلىسىم شەڭبەرىندە جۇڭگو تاراپىمەن بىرلەسىپ 20 مىڭ شارشى مەتر اۋماققا سالىندى. جوبا ىسكە قوسىلعاننان كەيىن وقۋ ورداسىنىڭ ەلەكتر ەنەرگياسىنا دەگەن قاجەتتىلىگىنىڭ ءبىر بولىگى بالامالى كوزدەر ارقىلى قامتاماسىز ەتىلەتىن بولادى. بۇل ستۋدەنتتەر مەن قىزمەتكەرلەرگە تۇراقتى، ەكولوگيالىق تازا ەنەرگيانى پايدالانۋعا مۇمكىندىك بەرەدى، سونىمەن قاتار ۋنيۆەرسيتەتتىڭ يننوۆاسيالىق ءيميدجىن نىعايتادى.
بولاشاقتا جوسپارعا سايكەس قازۇۋ قالاشىعىنداعى بارلىق فاكۋلتەتتەر مەن جاتاقحانالار كۇن پانەلدەرىمەن قامتاماسىز ەتىلەدى. بۇعان قوسىمشا قالاشىقتاعى وقۋ كورپۋستارى مەن اكىمشىلىك عيماراتتارىنىڭ، ستۋدەنتتەر ءۇيىنىڭ، عىلىمي ورتالىقتاردىڭ شاتىرلارى تولىق جاڭارتىلادى. شاتىرداعى ەسكى جابىندىلار الىنىپ، تەگىستەۋ جۇمىستارى جۇرگىزىلدى. كەيىن قارا قاعاز توسەلىپ، سۋاعار جۇيەسى ورناتىلدى. اتالعان شارالار نىساننىڭ ۇزاق مەرزىمگە قىزمەت ەتۋىن قامتاماسىز ەتۋ باعىتىندا اتقارىلىپ جاتىر.