قۇلشىنىس ارمانعا جەتەلەيدى
بوكستىڭ پاديشاسى اتانعان مۇحاممەد ءالي «چەمپيون جاتتىعۋ زالدارىندا پايدا بولمايدى. ادامنىڭ ىشىندەگى قۇلشىنىس ارمان، ماقسات چەمپيوندى تۋدىرادى» دەپتى. وسى ويعا قاراپ، ءبىرتالاي ويدى شيراتا تۇسۋگە بولادى. سونداي-اق مۇنى ءبىر عانا سپورت سالاسىنا تەلۋ ابەستىك بولار. ايگىلى سپورتشىنىڭ ءپالسافاعا تولى ويلارى ءالى كۇنگە شەيىن جۇرتتىڭ جادىندا كەلەدى.
قۇلشىنىس باستاۋى نەدە؟ وتە تەرەڭ فيلوسوفيالىق ساۋال. ءبىراق، تىم جاۋابى تابىلمايتىن كۇرمەۋلى دۇنيە دەپ تە اتاي الماسىمىز انىق. ولاي بولاتىنى، بۇنىڭ قۇپياسى اركىمنىڭ وزىنە عانا ايان. ماسەلەن، تانىمال ازيالىق ميللياردەر روبەرت كيوساكيدىڭ ومىرىنەن مىسالدايىق. وعان ۇنەمى ءوز اكەسى (كەدەي اكەسى) ساباقتى جاقسى وقۋىن جانە اقشانىڭ ادامدى بۇزاتىندىعىن ەسكەرتپە رەتىندە ايتىپتى. ال وكىل اكەسى (بايلىقتىڭ كوزىن تابۋعا ۇيرەتكەن اكەسى) اقشانىڭ زور بيلىك، ۇلكەن مۇمكىنشىلىك ەكەندىگىن ۇدايى دالەلدەپ وتىرعان. وسى ارادان ءبىر نارسەنى العا تارتا الامىز. ەڭ باستىسى، بالانىڭ ومىرگە، قورشاعان ورتاعا، بولاشاققا دەگەن قۇلشىنىسى مىقتى بولسا، بارىنە جەتەتىنىنە ءومىر كۋا. ءبىزدىڭ كەيىپكەرىمىز روبەرت ەكى اكەسىنەن دە وزىنە قاجەتتى قاسيەتتەردى بويىنا سىڭىرە ءبىلدى. سونىڭ ارقاسىندا اتى دۇنيە جۇزىنە ءماشھۇر بوپ تانىلدى.
تالپىنىس ءتۇبى – تابىس. وسى كۇنى بارلىق ادامزات ورگە شىعۋعا قۇمارتىپ بارادى. ونىسى قۋانتادى. دۇرىس-اق! دەسە دە، قۇلشىنىس يگى قاسيەتتەردەن تۇرسا، نۇر ۇستىنە نۇر بولماق. ايتپەسە، جويقىن قارۋ ويلاپ تابۋ، نەبىر زياندى باكتەرولوگيالىق اۋرۋلاردى تۋدىرۋ سىندى نارسەلەر ادامزاتقا كەرى ىقپالىن تۋدىرادى. ءتىپتى قيىن بولۋى دا عاجاپ ەمەس.
ءتۇيىن. قۇلشىنىس – تىرشىلىك باستاۋى. وعان جەتۋ وڭاي. سول وڭايدى قالىپتاستىراتىن ءوزىڭىز. ۇلكەن كىسىلەر «ادام جاس كەزىندە تاۋەكەلشىل بولادى» دەپ جاتادى. وتە ورىندى ايتىلعان پىكىر. مىنە، وسى قاسيەتتەردى يگىلىك جولىنا جۇمساعاندى ابزال سانايمىز.