ۇكىمەت وتىرىسىندا ق ر اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەيەۆ ەلدەگى جەم-شوپ دايىنداۋ بارىسى جايىندا باياندادى، دەپ حابارلايدى almaty-akshamy.kz qazaqparat.kz سىلتەمە جاساپ.
«بيىلعى كليمات جاعدايى اۋىل شارۋاشىلىعى جانۋارلارىن ازىقپەن قامتاماسىز ەتۋدە بەلگىلى ءبىر قيىندىقتار تۋعىزدى. جاعدايدى تۇزەتۋ ءۇشىن ۇكىمەت ناقتى جەدەل شارالار قابىلداپ جاتىر. جەم-شوپ دايىنداۋ ماسەلەلەرى بويىنشا جەرگىلىكتى جانە ورتالىق اتقارۋشى ورگانداردىڭ قىزمەتىن ۇيلەستىرۋ جونىندەگى رەسپۋبليكالىق جەدەل شتاب قۇرىلىپ، جۇمىس ىستەپ جاتىر. زارداپ شەككەن وڭىرلەرگە قارجىلاي كومەك كورسەتىلىپ جاتىر. ماسەلەن، قۇرعاقشىلىقتان ەڭ كوپ زارداپ شەككەن ماڭعىستاۋ جانە قىزىلوردا وبلىستارىنا جەم-شوپ ساتىپ الۋعا جۇمسالعان شىعىندارىن وتەۋگە ۇكىمەت رەزەرۆىنەن 3،8 ملرد تەڭگە ءبولىندى»، - دەدى ە. قاراشوكەيەۆ.
ونىڭ ايتۋىنشا، ماڭعىستاۋ وبلىسىنا مال ازىعىن دايىنداۋ ماقساتىندا قوسىمشا 5،3 ملرد تەڭگە ءبولۋ ماسەلەسى شەشىمىن تاپتى.
«سونىمەن قاتار، جەم-شوپ دايىنداۋ پروبلەمالارىن شەشۋگە جەرگىلىكتى بيۋدجەتتەن 9،1 ملرد تەڭگە ءبولىندى. قوسىمشا تاعى 4،5 ملرد تەڭگە ءبولۋ كۇتىلىپ وتىر. زارداپ شەككەن وڭىرلدەردىڭ اۋىل شارۋاشىلىعى تاۋارىن وندىرۋشىلەردىڭ نەسيەلەرى بويىنشا قارىزدارىن ۇزارتۋ جانە قايتا قاراۋ تۋرالى شەشىم جاسالىپ، وتىنىمدەردى قابىلداۋ باستالدى. وبلىستاردا ازىق دايىنداۋ كولەمىن بارىنشا ارتتىرۋ بويىنشا شارالار كەشەنى ىسكە اسىرىلىپ وتىر. وڭىرلەرگە مال ازىعىن دايىنداۋ ماقساتىندا قوسىمشا 43،1 مىڭ توننا ارزانداتىلعان ديزەل وتىنى ءبولىندى»، - دەدى ءمينيستردىڭ مىندەتىن اتقارۋشى.