قازاقستاندا سوڭعى 3 اپتا بويى ەپيدەميولوگيالىق احۋالدىڭ بىرتىندەپ تۇراقتانۋى بايقالادى. بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترى الەكسەي سوي ءمالىم ەتتى، دەپ حابارلايدى almaty-akshamy.kz قازاقپارات تىلشىسىنە سىلتەمە جاساپ.
«قازاقستاندا 18 تامىزعا دەيىن COVID-19-دىڭ وڭ ناتيجەسىمەن 708 379 جانە كۆي تەرىس ناتيجەمەن 66 381 ناۋقاس تىركەلگەن. تۇركىستان وبلىسىنان باسقا بارلىق ءوڭىر «قىزىل» ايماقتا تۇر. قازاقستاندا سوڭعى 3 اپتا بويى ەپيدەميولوگيالىق احۋالدىڭ بىرتىندەپ تۇراقتانۋى بايقالادى. ءبىر اپتادا ورتاشا ەسەپپەن شامامەن 53 مىڭ جاعداي تىركەلەدى. 1 تامىزدان بەرى كوروناۆيرۋس ينفەكسياسىنىڭ تارالۋ يندەكسى قازاقستاندا 14 پايىزعا قىسقارىپ، 1،11-دەن 0،97-گە تومەندەدى»،- دەدى مينيستر.
ونىڭ دەرەگىنشە، ينفەكسيالىق توسەك-ورىنداردىڭ جۇكتەمەسى 53، ال رەانيماسيالىق توسەك-ورىنداردىڭ جۇكتەمەسى 47 پايىزدى قۇراپ وتىر.
«توسەك-ورىنداردىڭ ەڭ جوعارى جۇكتەمەسى اقتوبە وبلىسىندا 69%، قىزىلوردا وبلىسىندا 66%، ال الماتى وبلىسىندا 64 پايىزدى قۇرايدى»، - دەدى الەكسەي سوي.