ق.توقايەۆ: حالىقارالىق قاۋىپسىزدىكتىڭ بۇرىنعى جۇيەسى ەسكىرىپ بارادى

 پرەزيدەنت قاسىم-جومارت توقايەۆ جاھاندىق قاۋىپ-قاتەر مەن ونىڭ شەشىمىنە قاتىستى ويىن ءبىلدىردى.

مەملەكەت باسشىسى اتاپ وتكەندەي، الەمدەگى ەكسترەميزم مەن تەرروريزم ماسەلەسى ۋشىعىپ تۇر. ال ەنەرگەتيكالىق داعدارىس كومىرتەكتى بەيتاراپتىققا قول جەتكىزۋدە كەدەرگى كەلتىرىپ تۇر. سوڭعى جىلدارعى الاپات تابيعي اپاتتاردان كەلگەن شىعىن 3 ترلن اقش دوللارىنا جەتكەن، دەپ حابارلايدى Almaty-akshamy.kz 24.kz-كە سىلتەمە جاساپ. 

جاھان ءجۇزى ەكونوميكالىق، ەكولوگيالىق داعدارىسقا ۇشىراعان تۇستا ۇلتارالىق ارازدىق پەن مەملەكەتارالىق كيكىلجىڭدەر جىعىلعانعا جۇدىرىق بوپ تيەتىنى ايان.

«قازىرگى قاتەرلەرگە توتەپ بەرۋدە نە نارسەگە يەك ارتامىز؟ بۇل ساۋالعا تاريحتىڭ ءوزى ايقىنداپ بەرگەن جالعىز عانا جاۋابى بار. ءتۇزۋ نيەت، ديالوگ جانە حالىقارالىق ارىپتەستىك. جەتىستىككە كەپىل بەرەتىن وزگە دۇنيە جوق. قاي ماسەلە بولماسىن، بۇۇ-نىڭ جارعىلىق قاعيداسىنا ساي قازاقستان قاشان دا دوڭگەلەك ۇستەلدىڭ باسىندا ديالوگ قۇرا وتىرىپ، كەلەلى شەشىمگە كەلۋگە ۇندەيدى. ۇركىتىپ-قورقىتۋ، سانكسيا سالۋ، كۇش قولدانۋ – بۇلاردىڭ ەشقايسىسى تۇيتكىلدىڭ ءتۇيىنىن تارقاتقان ەمەس. وسىنداي كەزدە گۋمانيزمنىڭ قاعيداسىنا سۇيەنگەنىمىز ابزال. مۇندايدا ارينە، ءداستۇرلى دىندەردىڭ ماڭىزى زور. ادام ءومىرى مەن قۇقىعى، اركىمنىڭ مۇددەسىن ەسكەرۋ، اشىقتىق - وسىنىڭ ءبارى جاڭا قاۋىپسىزدىك جۇيەسىنىڭ باعاناسى بولۋى ءتيىس»، - دەدى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ.