ماگيسترالدىق تەمىرجول جەلىسىنىڭ 8 وبەكتىسىن تەكسەرىلدى.
قازاقستان تەمىر جولى كومپانياسىنىڭ 59 لاۋازىمدى تۇلعاسى اكىمشىلىك جاۋاپكەرشىلىككە تارتىلدى. بۇل تۋرالى ءماجىلىس دەپۋتاتتارىنىڭ ساۋالىنا ق ر باس پروكۋرورى بەرىك اسىلوۆتىڭ جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وسى جىلى كولىك كوميتەتىنىڭ اۋماقتىق بولىمشەلەرى ماگيسترالدىق تەمىرجول جەلىسىنىڭ 8 وبەكتىسىن تەكسەردى. ناتيجەلەرى بويىنشا ءارتۇرلى بۇزۋشىلىقتاردى جويۋ تۋرالى نۇسقاما بەرىلدى. ىشكى ىستەر مينيسترلىگى يندۋستريا جانە ينفراقۇرىلىمدىق دامۋ مينيسترلىگىمەن جانە قازاقستان تەمىر جولىمەن بىرلەسىپ، تەمىرجول توسەمىنىڭ بويىندا قورشاۋ قۇرىلعىلارىنىڭ بولۋىنا 1 022 تەكسەرۋ جۇرگىزدى. ونىڭ قورىتىندىسى بويىنشا قتج-عا 832 ۇسىنىس ەنگىزىلدى. اكىمشىلىك قۇقىق بۇزۋشىلىق تۋرالى كودەكستىڭ 479-بابى بويىنشا قتج-نىڭ 59 لاۋازىمدى تۇلعاسى اكىمشىلىك جاۋاپكەرشىلىككە تارتىلدى»، - دەدى بەرىك اسىلوۆ.
ونىڭ اتاپ وتۋىنشە، قتج پويىز قوزعالىسىنىڭ قاۋىپسىزدىگىن قامتاماسىز ەتۋ ماقساتىندا الدىن الۋ جۇمىسىن جۇرگىزىپ وتىرادى.
«تەمىر جولدارعا تىكەلەي جاقىن ورنالاسقان ەلدى مەكەندەردىڭ تۇرعىندارىنا قاۋىپتىلىگى جوعارى ايماقتاعى ءتارتىپ جانە مال جايۋ ەرەجەلەرىنىڭ تالاپتارى ءتۇسىندىرىلىپ كەلەدى. بوگدە ادامداردىڭ بەلگىلەنبەگەن جەرلەردەن وتۋىنە جول بەرمەۋ ماقساتىندا قۇقىق قورعاۋ ورگاندارىمەن بىرلەسىپ، ستانسالاردىڭ اۋماقتارىندا رەيدتەر جۇرگىزىلەدى»، - دەدى ول.