«قازاقستان تەمىر جولى» ۇلتتىق كومپانياسى بۇعان دەيىن باق-تا تاراعان پويىز بيلەتىنىڭ قىمباتتاعانى تۋرالى اقپاراتقا قاتىستى پىكىر ءبىلدىردى، دەپ حابارلايدى كومپانيانىڭ باسپا ءسوز قىزمەتى.
«قازاقستان تەمىر جولى» اق ۇلتتىق تاسىمالداۋشى بولا وتىرىپ، الەۋمەتتىك ماڭىزى بار ءوڭىرارالىق قاتىناس ءۇشىن تەمىرجول ءتاريفى بيىل ءبىر رەت – 1 قاڭتاردان باستاپ 7 پايىزعا كوتەرىلگەنىن حابارلايدى. ءتاريفتى وزگەرتۋ تۋرالى شەشىم كولىك مينيسترلىگىنىڭ كەلىسىمىمەن جانە شەكتى بەلگىلەنگەن باعانىڭ جىل سايىنعى ءوسۋى ەسكەرىلە وتىرىپ قابىلدانعان»، – دەدى كومپانيانىڭ باسپا ءسوز حاتشىسى ناريمان دۇيسەكەيەۆ.
سونداي-اق «قازاقستان تەمىر جولى» ۇلتتىق كومپانياسى الەۋمەتتىك ماڭىزى بار باعىتتار بويىنشا جۇرەتىن پويىزداردان بولەك، 2014 جىلدان بەرى كوممەرسيالىق پويىزدار دا قازاقستان بويىنشا جولاۋشىلاردى تاسىمالداپ، جەدەل تاسىمالداۋ قىزمەتىن ۇسىناتىنىن اتاپ ءوتتى. كوممەرسيالىق پويىزداردا بيلەتتىڭ قۇنى ساتىپ الۋ مەرزىمى مەن تاسىمالداۋ سۇرانىسىنا بايلانىستى بەكىتىلەدى.
سونىمەن قاتار قازاقستان رەسپۋبليكاسىندا جەكە اگەنتتىك كاسسالار جۇمىس ىستەيدى، كەيبىرەۋىندە بيلەتتەردى ساتىپ الۋ ءۇشىن كوميسسيا تولەۋگە تۋرا كەلەدى.