ق ر پرەمەر-مينيسترىنىڭ ورىنباسارى – قارجى ءمينيسترى ەرۇلان جاماۋبايەۆ G4 City جوباسىن ودان ءارى جۇزەگە اسىرۋ ماسەلەسى بويىنشا كەڭەس وتكىزدى.
G4 City جوباسىن ىسكە اسىرۋ بارىسى تۋرالى ۇلتتىق ەكونوميكا ۆيسە-مينيسترى باۋىرجان وماربەكوۆ باياندادى. ونىڭ ايتۋىنشا، بۇگىندە G4 City جوباسىن جۇزەگە اسىرۋ بويىنشا قادامدىق جوسپاردىڭ بارلىق نەگىزگى ءىس-شارالارى بەلگىلەنگەن مەرزىمدە اتقارىلۋدا.
«قازىرگى ۋاقىتتا وبلىس اكىمدىگىمەن بىرلەسىپ ق ر پرەزيدەنتىنىڭ «الماتى وبلىسىنىڭ اكىمشىلىك-اۋماقتىق قۇرىلىمىنىڭ كەيبىر ماسەلەلەرى تۋرالى» وكىمىن ىسكە اسىرۋ بويىنشا ۇيىمداستىرۋ جوسپارىنىڭ جوباسى ازىرلەندى»، — دەدى باۋىرجان وماربەكوۆ.
ۇيىمداستىرۋشىلىق ءىس-شارالار جوسپارى اياسىندا ەكونوميكالىق ەسەپتەردى، جاڭا قالانىڭ سحەمالىق كارتاسىن، مەملەكەتتىك قۇرىلىمدى، شتاتتىق كەستەلەردى جانە باسقا دا ءىس-شارالاردى دايىنداۋ جۇمىستارى جۇرگىزىلەدى.
سونىمەن قاتار قازىرگى ۋاقىتتا سالىق شىعىندارىن ەسەپكە الا وتىرىپ، قارجىلىق ەكونوميكالىق مودەل ازىرلەنىپ، مەرزىمدەردى انىقتاپ، جاۋاپتى ورىنداۋشىلاردى بەلگىلەيتىن جول كارتاسىنىڭ جوباسى دايىندالدى. وبلىس اكىمدىگى ارنايى ەكونوميكالىق ايماق اۋماعىنىڭ شەكاراسىن كەڭەيتۋ تۋرالى ۇكىمەت قاۋلىسىنىڭ جوباسىن ازىرلەۋدە.
باۋىرجان وماربەكوۆ حالىقارالىق ينۆەستورلارعا جوبانىڭ ناقتى باستالۋى تۋرالى بەلگى بولاتىن ءىرى نىسانداردىڭ قۇرىلىسىن باستاۋ قاجەت ەكەنىن اتاپ ءوتتى.
كەڭەس سوڭىندا ەرۇلان جاماۋبايەۆ مەملەكەتتىك ورگاندارعا ق ر پرەمەر-مينيسترىنىڭ تاپسىرمالارىن ورىنداۋ بويىنشا كەشەندى شارالار قابىلداۋدى، ال الماتى وبلىسىنىڭ اكىمدىگىنە مەملەكەتتىك ورگاندارمەن بىرلەسىپ G4 City جوباسىن ىسكە اسىرۋدى جەدەلدەتۋدى تاپسىردى.