قازاقستان رەسپۋبليكاسىنىڭ ۇلتتىق مۋزەيى «جىبەك جولىنىڭ ورتاق مۇراسى» ۆيرتۋالدى كورمەسىندە ءوز كوللەكسياسىنان 10 ەكسپونات ۇسىندى.
جوبانى يۋنەسكو-نىڭ الماتىداعى وڭىرلىك كەڭسەسى جۇزەگە اسىردى، دەپ حابارلايدى aqshamnews.kz مادەنيەت جانە اقپارات مينيسترلىگىنىڭ باسپا ءسوز قىزمەتىنە سىلتەمە جاساپ.
ۆيرتۋالدى كورمە Google Arts & Culture پلاتفورماسىندا جاريالانعان جانە ونى مىنا سىلتەمە ارقىلى تاماشالاۋعا بولادى https://artsandculture.google.com/pocketgallery/nAWxtrFiZ4dQ1Q.
Google Arts & Culture – بۇل الەمدەگى سەرىكتەس مادەني ۇيىمداردىڭ ونەر تۋىندىلارى مەن مادەني ارتەفاكتىلەرىنىڭ جوعارى ساپاداعى سۋرەتتەرى مەن بەينەلەرى بار Google باسقاراتىن ونلاين پلاتفورما.
قازىرگى ۋاقىتتا سەرۆيس ۇجىمى كەمىندە 80 ەلدەگى 2 مىڭنان استام مادەني مەكەمەلەرمەن ىنتىماقتاستىق ورناتقان. قولدانۋشىلار پلاتفورمادان ونەر تۋىندىلارىنىڭ كوشىرمەلەرىن، ساۋلەت ەسكەرتكىشتەرى مەن يۋنەسكو-نىڭ بۇكىلالەمدىك مۇرا نىساندارى تۋرالى مالىمەتتەردى تابا الادى. سونداي-اق، سايتتا بۇكىل الەمدەگى مادەني مەكەمەلەردىڭ مۇراعاتتارىن كورۋگە مۇمكىندىك بەرەتىن سيفرلىق كورمەلەر بار.
«جىبەك جولىنىڭ ورتاق مۇراسى» ۆيرتۋالدى كورمەسى يران، قازاقستان، قىرعىزستان، وزبەكستان، تاجىكستان مەن تۇركمەنستاننىڭ ۇلتتىق مۋزەيلەرىنەن جىبەك جولىنىڭ مادەني مۇراسىن سيپاتتايتىن 60 كورنەكتى مۋزەي جادىگەرىنەن تۇرادى.