ق ر ۇكىمەتى اۋىل شارۋاشىلىعى تاۋارىن وندىرۋشىلەرگە قولداۋ كورسەتۋ ءۇشىن رەزەرۆتەن 30 ملرد تەڭگە ءبولدى.
پرەمەر-مينيستر ءاليحان سمايىلوۆ ءتيىستى قاۋلىعا قول قويدى. بۇل شارا مال وسىرۋشىلەر الدىنداعى سۋبسيديالار بويىنشا بەرەشەكتى وتەۋگە مۇمكىندىك بەرەدى، دەپ حابارلايدى Almaty-akshamy.kz Primeminister.kz-كە سىلتەمە جاساپ.
قۇجاتتا اۋىل شارۋاشىلىعى مينيسترلىگىنە اباي، جەتىسۋ، اقمولا، الماتى، شىعىس قازاقستان، جامبىل، باتىس قازاقستان، ماڭعىستاۋ، پاۆلودار جانە سولتۇستىك قازاقستان وبلىستارىنىڭ بيۋدجەتتەرىنە اسىل تۇقىمدى مال شارۋاشىلىعىن دامىتۋ، ونىمدىلىك پەن ءونىم ساپاسىن ارتتىرۋدى سۋبسيديالاۋعا نىسانالى ترانسفەرتتەر تۇرىندە 30 ملرد تەڭگە ءبولۋ تۋرالى جازىلعان.
وسى قاۋلىنىڭ قوسىمشاسىنا سايكەس، اقمولا وبلىسىنىڭ اكىمدىگىنە ەڭ كوپ قاراجات – 7،8 ملرد تەڭگە ءبولىندى. جامبىل وبلىسىنا 5 ملرد تەڭگە، شقو-عا 4،5 ملرد تەڭگە، بقو مال وسىرۋشىلەرىنە 1 ملرد تەڭگە باعىتتالدى.
اۋىل شارۋاشىلىعى مينيسترلىگىنە قاجەتتى شارالاردى قابىلداۋ، ال قارجى مينيسترلىگىنە بولىنگەن قاراجاتتىڭ ماقساتتى پايدالانىلۋىن باقىلاۋ تاپسىرىلدى.
جالپى بيىل اگروونەركاسىپ كەشەنىن سۋبسيديالاۋعا ۇكىمەت بارلىق كوزدەردەن 494 ملرد تەڭگە ءبولدى. جاقىن ارادا ينۆەستيسيالىق سۋبسيديالاۋعا جانە نەسيەلەر مەن ليزينگ بويىنشا پايىزدىق مولشەرلەمەنى سۋبسيديالاۋعا قوسىمشا 30 ملرد تەڭگە ءبولۋ جوسپارلانىپ وتىر.