ماڭعىستاۋ وبلىسىندا تاجىريبە تۇرىندە 2 مىڭ ءتۇپ ءزايتۇن اعاشى ەگىلدى. بۇل تۋرالى وبلىس اكىمى نۇرلان نوعايەۆ ەلورداداعى ەسەپ بەرۋ بريفينگىندە ايتتى، دەپ حابارلايدى اlmaty-akshamy.kz.
«بيىل اتاپ وتەر ءبىر ماسەلە – جەرگىلىكتى كاسىپكەرلەر ماڭعىستاۋ وبلىسىندا تاجىريبە تۇرىندە ءزايتۇن اعاشىن ەگۋ ماسەلەسىن قولعا الىپ جاتىر. قازىرگى تاڭد2 مىڭ ءتۇپ ءزايتۇن اعاشى ەگىلدى، سونىمەن بىرگە تاجىريبە تۇرىندە ارىس جانە جاركەنت قالالارىندا ەگىلگەن بولاتىن. وسى تاجىريبە وڭ ناتيجە كورسەتەر بولسا، كاسىپكەرلەر 10 مىڭ گەكتارعا دەيىن ءزايتۇن ەگىپ، ونىڭ مايىن كاسىپ ەتۋدى جوسپارلاپ وتىر»، - دەدى ن.نوعايەۆ ورتالىق كوممۋنيكاسيالار قىزمەتىندە.
جالپى وبلىستاعى اگونەركاسىپ كەشەنى 10 ايدىڭ قورىتىندىسى بويىنشا، بىلتىرعى ەسەپتىك كەزەڭمەن سالىستىرعاندا ءوسىم كورسەتىپ وتىر.
بيىل جالپى قۇنى 1 ملرد بولاتىن 4 جوبا ىسكە استى، 80 جاڭا جۇمىس ورنى اشىلدى. ونىڭ ىشىندە ازىق-تۇلىك ساقتايتىن قويمالار، جىلىجاي كەشەنى، ەت وڭدەۋ كومبيناتى جانە ەت ونىمدەرىن كونسەرۆىلەۋ جوبالارى جۇزەگە اسقان.
«كەلەسى جىلعا ءبىز 5 جوبانى جوسپارلاپ وتىرمىز، ونىڭ ىشىندە 4 جىلىجاي قۇرىلىسى بار. سەبەبى بىزگە ازىق-تۇلىكتىڭ 84 پايىزى سىرتتان كەلەدى. سول تاۋەلدىلىكتى ازايتۋ ءۇشىن جىلىجايلار قوسامىز. سونىمەن بىرگە، ازىق-تۇلىك ساقتايتىن قويمالاردى سالۋ ماسەلەسى بار. بۇل جوبالاردىڭ قۇنى – 2،2 ملرد تەڭگە»، - دەدى وبلىس اكىمى.
ايتا كەتەيىك، نۇرلان نوعايەۆ استانادا ماڭعىستاۋ وبلىسىنىڭ بيىلعى الەۋمەتتىك-ەكونوميكالىق دامۋى تۋرالى ەسەپ بەرىپ جاتىر.