ق ر پرەمەر-مينيسترى ءاليحان سمايىلوۆتىڭ توراعالىعىمەن «قازاقستاندىق شەتەلدىك ينۆەستورلار كەڭەسى» قاۋىمداستىعىنىڭ كەڭەسى ءوتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
ۇكىمەتتىڭ باسپا ءسوز قىزمەتى تاراتقان مالىمەتكە سەنسەك، تاراپتار ءونىمدى تاسىمالداۋ جانە ەكسپورتتاۋ، ەكسپورتتىق باعىتتار، كيبەرقاۋىپسىزدىك ماسەلەلەرى جانە قازاقستان ۇكىمەتى مەن شەتەلدىك كومپانيالار اراسىنداعى ىنتىماقتاستىقتىڭ وزگە دە نەگىزگى اسپەكتىلەرى جونىندە پىكىر الماستى.
ءاليحان سمايىلوۆ قالىپتاسقان سەنىم دەڭگەيى مەن ءوزارا ءتيىمدى ىنتىماقتاستىققا دەگەن ورتاق ۇمتىلىس ىقتيمال تاۋەكەلدەردى بارىنشا ازايتۋعا، ىنتىماقتاستىق ءۇشىن جاڭا پەرسپەكتيۆالاردى اشۋعا مۇمكىندىك بەرەتىنىن جەتكىزدى.
قازاقستان پرەمەر-مينيسترى كەڭەس جۇمىسىنا بەلسەندى قاتىسقانى ءۇشىن قشيكق مۇشەلەرىنە العىسىن ءبىلدىرىپ، ءبىزدىڭ ەلىمىز جاڭا ينۆەستورلاردىڭ، سونداي-اق قازاقستاندا جۇمىس ىستەپ جاتقان ينۆەستيسيالىق قوعامداستىقتىڭ سىندارلى ۇسىنىستارىنا اشىق ەكەنىن اتاپ ءوتتى.