فينالدىق كەزەڭدە مەدالدار سپورتتىڭ ءتورت ءتۇرى بويىنشا ويناتىلدى
22-24 مامىر ارالىعىندا نۇر-سۇلتان قالاسىندا ج.ۇشكەمپىروۆ اتىنداعى جەكپە-جەك سارايىندا قازاقستان رەسپۋبليكاسى مادەنيەت جانە سپورت ءمينيسترىنىڭ كۋبوگى ءۇشىن ءتۋرنيردىڭ فينالدىق كەزەڭى ءوتتى. جارىسقا ەلىمىزدىڭ سپورت ينتەرناتتارى مەن كوللەدجدەرىنىڭ 2006-2007 جىلدارى تۋعان جاسوسپىرىمدەرى قاتىستى، دەپ حابارلايدى Almaty-akshamy.kz.
ق ر مادەنيەت جانە سپورت ءمينيسترى داۋرەن ابايەۆ سالتاناتتى اشىلۋ راسىمىنە قاتىسىپ، جارىستىڭ اقتىق كەزەڭىن باقىلادى، ونىڭ قورىتىندىسى بويىنشا جەڭىمپازدار مەن جۇلدەگەرلەرگە مەدالدار تابىستادى.
«سپورتشىلار مەن جاتتىقتىرۋشىلار جانە بولاشاق چەمپيونداردىڭ اتا-انالارى ءۇشىن شىن جۇرەكتەن قۋانىشتىمىن. وڭىرلەردە وسى جارىستى وتكىزۋ تۋرالى باستامانى ۇلكەن ىنتامەن قارسى العاندارى قۋانتادى. كۇردەلى ىرىكتەۋ كەزەڭدەرىنەن كەيىن ەلوردادا ەڭ مىقتى سپورتشىلار جينالدى. بۇل جارىستاردىڭ اتموسفەراسى سىزدەرگە جاعىمدى ەموسيا مەن ادەمى اسەر سىيلايدى، ال جارقىن جەڭىس قوسىمشا سەرپىن مەن موتيۆاسيا بەرەدى دەپ سەنەمىن»، - دەدى مينيستر.
سونداي-اق، داۋرەن ابايەۆ اتالعان جارىس ءداستۇرلى تۇردە وتەتىنىنە جانە جاس تالانتتاردى اشۋعا كومەكتەسەتىنىنە سەنىم ءبىلدىردى.
ايتا كەتەيىك، 1-4 مامىر ارالىعىندا وتكەن ىرىكتەۋ كەزەڭىنە رەسپۋبليكانىڭ بارلىق وڭىرىنەن 17 كوماندا قاتىستى. وڭىرلىك تۋرنير نۇر-سۇلتان، الماتى، اقتوبە جانە تاراز قالالارىندا ءوتتى.
فينالدىق كەزەڭدە مەدالدار سپورتتىڭ ءتورت ءتۇرى بويىنشا ويناتىلدى: بوكس، دزيۋدو، گرەك-ريم جانە ەركىن كۇرەس. ءمينيستردىڭ دەبيۋتتىك كۋبوگىنىڭ جالپى جۇلدە قورى 10 ميلليون تەڭگەنى قۇرايدى. 1 ورىن - 5 ميلليون، 2 ورىن – 3 ميلليون، 3 ورىن – 2 ميلليون تەڭگە.
جارىس قورىتىندىسى:
1 ورىن - ق. مۇڭايتپاس ۇلى اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى (نۇر-سۇلتان قالاسى)
2 ورىن - كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى (الماتى قالاسى)
3 ورىن - قىزىلوردا وبلىسىنىڭ «ءجالاڭتوس ءباحادۇر اتىنداعى وليمپيادا رەزەرۆىنىڭ وبلىستىق مامانداندىرىلعان مەكتەپ-ينتەرنات-كوللەدجى» كمم (قىزىلوردا وبلىسى).
