ق ر كونستيتۋسيالىق سوتى سالىق كودەكسى نورمالارىنىڭ كونستيتۋسياعا سايكەستىگىن تەكسەرۋ بويىنشا ءىستى قارادى
17 اقپاندا كونستيتۋسيالىق سوت «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسى كودەكسىنىڭ كەيبىر ەرەجەلەرىنىڭ كونستيتۋسيالىلىعىن تەكسەرۋ تۋرالى ءىستى قاراۋدى باستادى، دەپ حابارلايدى Almaty-akshamy.kz.
بۇل ءىس ازاماتتىڭ مەملەكەتتىك باج مولشەرىنە قاتىستى جوعارعى سوتقا شاعىمدانۋىمەن بايلانىستى بولدى.
2023 جىلعى 24 قاڭتاردا از. ە. دوسماعامبەتوۆتەن «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسى كودەكسىنىڭ 610-بابى 1-تارماعى 1) تارماقشاسىنىڭ جانە 2-تارماعىنىڭ كونستيتۋسياعا سايكەستىگىن قاراۋ تۋرالى ءوتىنىش ءتۇستى.
ازامات ءوزىنىڭ ارىزىندا داۋلانىپ وتىرعان نورما قازاقستان رەسپۋبليكاسى كونستيتۋسياسىنىڭ 13-بابىنىڭ 2-تارماعىن، 14-بابىن، سونداي-اق 1948 جىلعى 10 جەلتوقسانداعى بۇۇ باس اسسامبلەياسىنىڭ 217 ا (III) قارارىمەن قابىلدانعان ادام قۇقىقتارىنىڭ جالپىعا بىردەي دەكلاراسياسىنىڭ 7-بابىن جانە 1966 ج. 16 جەلتوقساندا قابىلدانعان جانە 2005 جىلعى 28 قاراشاداعى №91-III زاڭمەن راتيفيكاسيالانعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ 2-بابىن بۇزادى دەپ كورسەتكەن.
بۇعان دەيىن 2018 جىلى شىعارىلعان سوت شەشىمىمەن كەلىسپەگەندىكتەن، ازامات سوت اكتىلەرىنە جوعارعى سوتقا شاعىمدانعان. الايدا ارىزدانۋعا بايلانىستى بەلگىلەنگەن مەملەكەتتىك باج (ءوتىنىش بەرۋشى حابارلاعانداي، شامامەن 2 ملن. تەڭگە مولشەرىندە) ونىڭ قازاقستان رەسپۋبليكاسى كونستيتۋسياسىنىڭ 13-بابىنىڭ 2-تارماعىندا كوزدەلگەن سوت قورعاۋىنا قۇقىعىن شەكتەيدى.
2018 جىلدان باستاپ ە.ن.دوسماعامبەتوۆ جوعارعى سوتقا وتىنىشپەن ءۇش رەت جۇگىنگەن، ءوتىنىش يەسىنىڭ ارىزىن مەملەكەتتىك باجدى تولەمەۋىنە بايلانىستى قاراۋدان باس تارتقان.
كونستيتۋسيالىق سوتتا ازاماتتىڭ مۇددەسىن ادۆوكات قورعادى.
ءوتىنىشتىڭ ءمانى بويىنشا كونستيتۋسيالىق سوت پارلامەنت سەناتىنىڭ، باس پروكۋراتۋرانىڭ، قارجى، ادىلەت جانە ۇلتتىق ەكونوميكا مينيسترلىكتەرىنىڭ، ادام قۇقىقتارى جونىندەگى ۋاكىلدىڭ وكىلدەرىن تىڭداپ، سونداي-اق رەسپۋبليكالىق نوتارياتتىق پالاتانىڭ، رەسپۋبليكالىق ادۆوكاتتار القاسىنىڭ، قارجى جانە سالىق قۇقىعى عىلىمي-زەرتتەۋ ينستيتۋتىنىڭ جانە كاسپيي ۋنيۆەرسيتەتىنىڭ قورىتىندىلارىن زەردەلەدى.
ءوتىنىشتى قاراۋ قورىتىندىسى بويىنشا كونستيتۋسيالىق سوتتىڭ نورماتيۆتىك قاۋلىسى زاڭنامالىق اكتىلەردى رەسمي جاريالاۋ قۇقىعىن العان مەرزىمدى باسپا ءسوز باسىلىمدارىندا، قۇقىقتىق اقپاراتتىڭ ءبىرىڭعاي جۇيەسىندە، كونستيتۋسيالىق سوتتىڭ ينتەرنەت-رەسۋرسىندا، سونداي-اق باسقا دا دەرەككوزدەردە ورنالاستىرىلاتىن بولادى.