الماتى قالاسىنىڭ اۆياسيالىق كولىك پروكۋراتۋراسى جولاۋشىلار قۇقىعىن ساقتاۋ ماسەلەسى بويىنشا «فلاي ارىستان» اق اۆياكومپانياسىنا تەكسەرۋ جۇرگىزدى، دەپ حابارلايدى Almaty-akshamy.kz.
تەكسەرۋ كورسەتكەندەي، اۆياكومپانيا حالىقارالىق رەيستەرگە بيلەتتەردى ساتۋ كەزىندە 2 جاستان 12 جاسقا دەيىنگى كامەلەتكە تولماعان جولاۋشىلارعا ارنايى 50% جەڭىلدىكتى قولدانباعان.
مىسالى، 2022 جىلدىڭ قاڭتارىنان قازانىنا دەيىن حالىقارالىق باعىتتار بويىنشا ستاندارتتى تاريف بويىنشا 3 مىڭنان استام كامەلەتكە تولماعان بالا تاسىمالدانعان.
پروكۋراتۋرانىڭ ۇسىنۋى نەگىزىندە ازاماتتىق اۆياسيا كوميتەتى اۆياكومپانياعا قاتىستى اكىمشىلىك قۇقىق بۇزۋ كودەكسىنىڭ 571-بابىنىڭ 1-بولىگى بويىنشا اكىمشىلىك حاتتاما تولتىردى.
جينالعان ماتەريالدار الماتى قالاسىنىڭ اكىمشىلىك قۇقىقبۇزۋشىلىقتار جونىندەگى مامانداندىرىلعان اۋدانارالىق سوتىندا قارالدى.
16 اقپان كۇنى جولاۋشىلاردى تاسىمالداۋ ەرەجەلەرىن بۇزعانى ءۇشىن اۆياكومپانيانى اكىمشىلىك جاۋاپكەرشىلىككە تارتۋ جونىندە قاۋلى قابىلداندى.
سوت اكتىسى زاڭدى كۇشىنە ەنگەن جوق.