قازاقستان جازۋشىلار وداعىنىڭ مۇشەسى، ورالدىق اقىن مۇنايدار بالمولدا تانىمال ەسترادا ءانشىسى تورەعالي تورەالىنى سوتقا بەرمەكشى، دەپ حابارلايدى اlmaty-akshamy.kz.
بالمولدا ءوزىنىڭ الەۋمەتتىك جەلىدەگى پاراقشاسىندا "قازاقتىڭ جىلقىلارى" اتتى ولەڭىنىڭ ءتۇپنۇسقاسىن جاريالاپ، وقىرماندارىمەن ءبولىستى. بۇل ولەڭگە كومپوزيتور التىنبەك كارەسوۆ ءان جازعان. الايدا، تورەعالي تورەالى بۇل ءاندى رۇقساتسىز يەمدەنىپ الىپ، ءماتىنىن وزگەرتىپ، ءوز اتىمەن ورىنداعانى ءۇشىن اقىن نارازىلىق بىلدىرۋدە.
"اقىرىندا تورەعالي تورەالىنىڭ كوزى ءتۇسىپتى. تۇسكەنى قۇرسىن، ۇرلاپ الىپ، ءسوزىن جوق قىلىپ، ونىڭ ورنىنا قاينار الاكوزوۆكە ءسوز جازعىزىپ الىپ، ءبىر قوجالىقتىڭ ءانى قىلىپ، ايتىپ ءجۇر ەكەن! Tik-tok-تان بايقاپ قالىپ، ەسكەرتۋ جاسادىم. جاقسىلىقپەن قويا قوي، مەنىڭ اۆتورلىق قۇقىما قولىڭدى سۇقپا دەپ! جوق، بۇل بالا ءسوزدى تۇسىنبەيتىن بولىپ تۇر. YouTube ارناسىندا، ءوزىنىڭ پاراعىندا وسى ءان تۇر دەپ جىگىتتەر حابارلاسىپ جاتىر. بۇل ءانشى جىگىت التىنبەككە (كومپوزيتورعا) حابارلاسىپ، ءاندى سۇراپتى. التىنبەك ءوزىنىڭ كەلىسەتىنىن، ءبىراق مۇنايدار اعامنان رۇقسات سۇراڭىز دەپتى. ال تورەعالي مەنى ادام ەكەن دەمەگەن، اعام ەكەن دەمەگەن، ءوزىم بىلەمگە سالىپتى. ال وسىنىسى دۇرىس پا؟ مەنەن سۇراعان دا جوق. مەن رۇقسات بەرمەيتىن دە ەدىم. ءسوزىن وزگەرتپەي ايتسا، وندا ويلاناتىن ەدىم. ول مەنىڭ ءسوزىمدى جوق قىلعان عوي. ءان ولەڭىمە بولا تۋدى، سوعان ارنايى جازىلدى. ءبىرىنشى ولەڭ تۋدى، سوعان مەنىڭ تاپسىرىسىممەن ءان جازىلدى. سوندا بۇل ءاننىڭ اۆتورى كىم؟ سوتقا بەرسەم شە؟ مەنىڭ ءانىمدى رۇقساتىمسىز العانى ازداي، ونىمەن وزىنە جالعان ابىروي جيناپ ءجۇر. مۇعالجار جىلقىسى جايلى اندەتىپ، بىرەۋلەردەن اقشا الىپ، مەيماناسى تاسىپ تۇرعان بولار. وسىلاي مەنىڭ قازاقتىڭ جىلقىلارىنا، ياكي ۇلتىمىزدىڭ، حالقىمىزدىڭ اسىل جانۋارىنا ارناعان ءانىمدى تاپاپ وتپەكشى، جوق قىلماقشى"، - دەيدى مۇنايدار بالمولدا.
بۇل جاعداي قوعامدا ۇلكەن رەزونانس تۋدىرىپ، كوپتەگەن پىكىرتالاستارعا سەبەپ بولدى. اۆتورلىق قۇقىق ماسەلەسى تاعى دا كۇن تارتىبىنە قويىلدى. تورەعالي تورەالىنىڭ بۇل ارەكەتى زاڭگەرلەر مەن ونەر سۇيەر قاۋىمنىڭ نازارىنا ىلىكتى. الداعى ۋاقىتتا سوت پروسەسىنىڭ قالاي ءوربيتىنى ۇلكەن قىزىعۋشىلىق تۋدىرۋدا.