قازاقستاندىقتار QR ارقىلى مەملەكەتتىك قىزمەتتەر اقىسىن 700 مىڭنان استام رەت تولەدى
وتكەن جىلى «ازاماتتارعا ارنالعان ۇكىمەت» مەملەكەتتىك كورپوراسياسى Kaspi جانە Halyq Bank-پەن بىرلەسىپ، حقو-لاردا مەملەكەتتىك باجدى QR كومەگىمەن تولەۋ سەرۆيسىن ەنگىزدى. ءبىر جىل ىشىندە قازاقستاندىقتار QR كودتى 700 مىڭنان استام رەت سۇراتىپ، 2،8 ملرد تەڭگەدەن استام سوماعا تولەم جاساعان، دەپ حابارلايدى Almaty-akshamy.kz 24.kz-كە سىلتەمە جاساپ.
QR تولەمدى بەلسەندى قولدانعانداردىڭ ىشىندە الماتى قالاسىنىڭ تۇرعىندارى كوش باستاپ تۇر، ەكىنشى ورىندا قاراعاندىلىقتار، ودان كەيىن تىزىمدە استانالىق تۇرعىندار (تيىسىنشە 72 052، 63 278، 54 354). QR كودتىڭ كومەگىمەن مەملەكەتتىك قىزمەتتەردىڭ باج الىمىن ەڭ از تولەگەندەر اتىراۋ مەن سولتۇستىك قازاقستان وبلىسىنداعىلار (23 080 جانە 23 449 رەت).
«سەرۆيس ەنگىزىلگەن ساتتەن باستاپ، ءبىز وڭ وزگەرىستەر بايقاپ وتىرمىز – كليەنتتەر ۋاقىتىن ۇنەمدەپ، وپەراتوردىڭ الدىندا وتىرىپ-اق قىزمەت اقىسىن تولەپ ءجۇر. كاسسالاردىڭ جۇكتەمەسى تومەندەدى. سونداي-اق QR كود ارقىلى تولەم جاسالعاندا كوميسسيا الىنبايدى. وسىنىڭ بارلىعى بىزگە تاياۋ ۋاقىتتا حقو-داعى كاسسالاردىڭ سانىن ۇشتەن بىرگە دەيىن قىسقارتۋعا مۇمكىندىك بەرەدى»، – دەپ اتاپ ءوتتى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسقارما ءتوراعاسى ءادىل قوجىقوۆ.
ەستەرىڭىزگە سالا كەتەيىك، مەملەكەت باسشىسى 2021 جىلعى قىركۇيەكتەگى جولداۋىندا مەملەكەتتىك قىزمەتتەردى الۋ كەزىندەگى پروبلەمالارعا نازار اۋدارىپ، بۇل پروسەستەردى تولىعىمەن سيفرلاندىرۋدى تاپسىرعان بولاتىن. QR كود ارقىلى تولەم جاساۋ سياقتى سەرۆيستەر ازاماتتاردىڭ مەملەكەتتىك قىزمەتتەردى الۋ رەتىن جەڭىلدەتۋگە كومەكتەسەدى.
ءقازىر QR كودتىڭ كومەگىمەن 146 ءتۇرلى مەملەكەتتىك قىزمەتتىڭ اقىسىن تولەۋگە بولادى. بولاشاقتا بۇل ءتىزىم تولىقتىرىلاتىن بولادى. QR كود ارقىلى مەملەكەتتىك باج الىمىن تولەۋ Kaspi جانە Halyq Homebank ءموبيلدى قوسىمشالارى ارقىلى قولجەتىمدى.