پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك ءجۇمانعاريننىڭ ايتۋىنشا، قۇرىلىس سەكتورىندا قوسىلعان قۇن سالىعىنىڭ (ققس) ورنىنا ينفراقۇرىلىمدىق الىم ەنگىزۋ جوسپارلانىپ وتىر، دەپ حابارلايدى aqshamnews.kz
بۇل وزگەرىس باستاپقىدا قۇرىلىس سالاسىن ىنتالاندىرۋدى كوزدەگەنىمەن، ونىڭ نارىقتاعى ۇزاقمەرزىمدى اسەرى قانداي بولماق؟
«ەڭ ىقتيمال نۇسقا رەتىندە قۇرىلىس كومپانيالارىنان الىناتىن ينفراقۇرىلىمدىق الىمدى ەنگىزۋدى قاراستىرىپ وتىرمىز. ونىڭ مولشەرى – ازىرگە شارشى مەترىنە 40-60 دوللار كولەمىندە. ينفراقۇرىلىمدىق جۇكتەمەگە بايلانىستى وزگەرەدى. جاڭا سالىق ويلاپ تاپپايمىز. ءقازىر بۇل ماسەلەلەر تالقىلانىپ جاتىر. ولار تۇرعىن ءۇيدىڭ ساناتىنا قاراي رەتتەلەدى»، دەدى س.جۇمانعارين.
ۇلتتىق ەكونوميكا ءمينيسترىنىڭ ايتۋىنشا، قۇرىلىس سەكتورىندا ققس مولشەرلەمەسى نولگە تەڭەستىرىلەدى نەمەسە تومەندەتىلەدى. قازىرگى قولدانىستاعى سالىق كودەكسىنە سايكەس تۇرعىن ۇيلەردى ساتۋ مەن جالعا بەرۋ ققس-تان بوساتىلعان. الايدا جاڭا كودەكس جوباسىندا بۇل جەڭىلدىك 2025 جىلعى 1 قاڭتارعا دەيىن عانا ساقتالماق.
وسىدان كەيىن ساتىلاتىن جانە جالعا بەرىلەتىن بارلىق تۇرعىن ۇيلەر ققس-قا باعىنۋى مۇمكىن. دەمەك قۇرىلىس كومپانيالارى جاڭا سالىقتى پاتەر باعاسىنا ەنگىزەتىن بولسا، باسپانا قۇنى كۇرت ءوسۋى عاجاپ ەمەس.
سالىق ماماندارى بۇل وزگەرىستىڭ حالىققا اۋىر سوققى بولاتىنىن العا تارتادى. سەبەبى قۇرىلىسشىلار وزدەرىنىڭ قارجىلىق جۇكتەمەسىن تۇتىنۋشىعا جۇكتەيتىنى انىق. وسىلايشا، ءۇي الۋعا نيەتتى ازاماتتار ققس-نى قوسىمشا شىعىن رەتىندە كوتەرۋى كادىك. بۇل اسىرەسە، يپوتەكالىق قارىز الۋشىلار ءۇشىن قيىندىق تۋدىرادى، ويتكەنى سالىقتىڭ سوماسى نەسيە مولشەرىنە تىكەلەي اسەر ەتەتىنى بەلگىلى. سول سەبەپتى، تۇرعىن ءۇي باعاسى ءوسىپ، باسپاناعا مۇقتاج جانداردىڭ جاعدايى قيىنداي ءتۇسۋى مۇمكىن.
جاقىندا وتكەن پرەزيدەنتتىڭ كاسىپكەرلەرمەن كەزدەسۋىندە «BI Group» باسشىسى ايدىن راقىمبايەۆ وسى ماسەلەنى كوتەردى. ول ققس مولشەرلەمەسىن تۇرعىن ءۇي ساناتىنا قاراي سارالاۋ قاجەت ەكەنىن ايتتى. ەگەر بۇل وزگەرىس قابىلدانسا، ارزان باسپانا قولجەتىمدى بولىپ قالا بەرەدى، ال قىمبات جىلجىمايتىن مۇلىككە سالىناتىن سالىق جوعارىلايدى. ۇكىمەت مۇشەلەرى كاسىپكەردىڭ بۇل ۇسىنىسى ەسكەرىلەتىنىنە ۋادە بەردى.
وتكەن جۇمادا ۇلتتىق ەكونوميكا ۆيسە-مينيسترى ارمان قاسەنوۆ ققس-نىڭ تۇرعىن ءۇي باعاسىنا اسەرىن تولىق بولجاۋ مۇمكىن ەمەس ەكەنىن مالىمدەدى. ونىڭ ايتۋىنشا، قۇرىلىس نارىعىنداعى باعانىڭ باستى رەتتەۋشىسى – تەڭگە باعامى مەن ينفلياسيا دەڭگەيى.